स्वतन्त्रता दिवसमा भारतीय दूतावासद्वारा विशेष कार्यक्रमको आयोजना

काठमाडौँ– भारतको ७२ औँ स्वतन्त्रता दिवसका अवसरमा आज काठमाडौँस्थित भारतीय दूतावासले विशेष कार्यक्रमको आयोजना गरी राष्ट्रिय झण्डा फहराएको छ ।

नेपालका लागि भारतका राजदूत मंजिवसिंह पुरीले आफ्नो राष्ट्रको राष्ट्रिय ध्वजा फहराउँदै भारतीय राष्ट्रपति रामनाथ कोविन्दले जारी गरेको सन्देश वाचन गरेका थिए । सन्देशमा भारतले बितेका ७१ वर्षमा हासिल गरेका उपलब्धि समेटिएको छ ।

सो अवसरमा भारत सरकारको तर्फबाट राजदूत पुरीले ६८ वटा पुस्तकालय तथा नेपालका सबै प्रदेशमा फैलिएका शैक्षिक संस्थालाई रु १७ लाख बराबरको पुस्तक वितरण गर्नुका साथै विभिन्न अस्पताल, गैरनाफामूलक परोपकारी संस्था र शैक्षिक संस्थालाई ३० वटा एम्बुलेन्स र छ वटा बसका साँचो हस्तान्तरण गरेका थिए ।

भारत सरकारले नेपालका ७७ जिल्लाका विभिन्न अस्पताल, गैरनाफामूलक परोपकारी संस्था तथा शैक्षिक प्रतिष्ठानलाई हालसम्म ६९२ वटा एम्बुलेन्स र १३६ वटा बस उपहारस्वरुप प्रदान गरिसकेको छ । रासस