समयमै कांग्रेस महाधिवेशनको माग राख्दै देउवा निवास अगाडि कार्यकर्ताद्वारा प्रदर्शन

काठमाडौँ– कांग्रेस नेता तथा कार्यकर्ताले वैधानिक समयमा नै महाधिवेशनको माग गर्दै नेपाली कांग्रेसका सभापति एवं प्रधानमन्त्री शेरबहादुर देउवाको निजी निवास बूढानिलकण्ठअगाडि प्रदर्शन गरेका छन् ।

सभापति देउवा निवासमा बिहिवार बस्न लागिएको कांग्रेसको केन्द्रीय समिति बैठकको मौकामा सबल कांग्रेसका लागि हाम्रो अभियानमा आवद्ध रहेका युवाहरूले प्रदर्शन गरेका हुन् ।

प्रतिनिधिमुलक रूपमा प्रदर्शन र धर्ना दिनेमा पार्टीका सातै प्रदेशका नेता तथा कार्यकर्ता रहेका छन् । उनीहरु देउवा निवास बाहिर ‘कांग्रेस नेताहरूले महाधिवेशन सुनिश्चित गरौं’ जस्ता लेखिएका प्लेकार्ड लिएर प्रदर्शनमा उत्रिएका छन् । केन्द्रीय कार्यसमितिको बैठकलाई ९ लाखभन्दा बढि क्रियाशिल कार्यकर्ताको महाधिवेशनको चाहाना विरुद्ध गएर मनपरी गर्न नपाइने र पार्टीको १४ औं महाधिवेशन वैधानिक समयसिमा भित्र नै हुनुपर्ने उनीहरुको माग छ ।

उनीहरूले नेपालको संविधान र पार्टी विधान सभापति देउवालगायत शीर्ष नेतालाई बुझाउने कार्यक्रम छ । यता भने, आजको बैठकमा भाग लिन नेताहरू बूढानिलकण्ठ जाने क्रम जारी छ ।

विधानअनुसार देउवाको कार्यकाल भदौ २३ मा सकिँदैछ। आज देउवा निवासमा बस्ने बैठकले महाधिवेशन सार्ने तयारी गरेकोमा पनि उनीहरूले विरोध गरेका हुन् ।