स्याङजामा बुथ कब्जा भएको पुष्टि हुने आधार भेटिएको छ : इन्सेक

काठमाडौं – अनौपचारिक क्षेत्र सेवा केन्द्र (इन्सेक)ले स्याङजामा बुथ कब्जा भएको आरोप पुष्टि हुने आधार भेटिएको बताएको छ ।

अध्यक्ष डा इन्दिरा श्रेष्ठद्वारा जारी गरिएको विज्ञप्तिमा नेकपा एमाले, राष्ट्रिय स्वतन्त्र पार्टी, राप्रपालगायतका दलले लगाएको बुथ कब्जाको आरोप पुष्टि हुने आधार भेटिएको उल्लेख गरिएको छ । सो घटनाको अध्ययन गर्न मंसिर ९ गते स्याङ्जा गएको इन्सेकको टोलीमाथि नाम नखुलेका केही व्यक्तिले गरेको अभद्र व्यवहारप्रति पनि इन्सेक देख प्रकट गरेको छ ।

अनुगमनका लागि इन्सेकको टोली चापाकोट नगरपालिका-५ स्थित जनसक्रिय आधारभूत विद्यालय, चिठीपोखरी मतदान केन्द्रमा पुग्दा केही स्थानीयले तत्कालै फर्कन र भविष्यमा जे पनि हुनसक्ने भन्दै धम्क्याएको बताएको छ । घटनामा संलग्नलाई कारबाहीको दायरामा ल्याउन तथा निर्बाध अनुगमनको वातावरण तयार गर्न निर्वाचन आयोग तथा नेपाल सरकारसँग इन्सेकले आग्रह गरेको छ ।