थोरै भात र एउटा रोटी खाएर बस्ने मलाई करोडौंको भाँडाकुँडा किन चाहियो ? : ओली

काठमाडौं – एमालेका अध्यक्ष केपी शर्मा ओलीले प्रधानमन्त्री हुँदा करोडौंको भाँडाकुँडा किनेको आरोपको खण्डन गरेका छन् ।

सिन्धुचाल्चोक–काठमाडौं सम्पर्क मञ्चले शनिवार चावहिलमा आयोजना गरेको कार्यक्रमलाई सम्बोधन गर्दै नेकपा माओवादी केन्द्रका अध्यक्ष पुष्पकमल दाहाल प्रचण्डले लगाएको आरोपको खण्डन गरेका हुन् ।

प्रचण्डले शुक्रवार चितवनमा बोल्दै ओली प्रधानमन्त्री हुँदा थाइल्यान्ड, इटाली र रोमबाट महँगा भान्छाको सामान ल्याएको प्रचण्डको आरोप छ ।

भान्छाका सामान मात्रै करोडौंको खरिद गरेको जानकारी पाएको बताएका थिए । प्रचण्डले भनेका थिए, ‘म प्रधानमन्त्री बनेका बेला डेढ लाखको खाटमा सुत्यो भनेर प्रचार गरियो, त्यो खाट मैले किनेको थिइनँ, त्यो खाट भाँच्न पनि भएन । ओलीले राजा ठानेर राजकीय जीवन बिताउन दरबार बनाउन लागेका रहेछन् ।’

ओलीले प्रचण्डको उक्त आरोपको सार्वजनिक खण्डन गरेका छन् । ओलीले भने, ‘मेरो भान्छामा त भाँडाकुँडा पनि आफ्नै हुन्थे के को सरकारी पैसामा किन्नु ? प्रधानमन्त्री निवासमा सेना पनि बस्छ, उसलाई खाना खानुपर्‍यो होला । भाँडाकुँडा चाहियो होला । मेरो श्रीमतीले पकाएको खाना खाएर बस्ने मलाई किन करोडौंको भाँडाकुँडा चाहियो ?’

‘थोरै भात र एउटा रोटी खाएर बस्ने मलाई करोडौंको भाँडाकुँडा किन चाहियो ?,’ ओलीले भने ।