ओली समूहको स्थायी कमिटी वैठक स्थगित

काठमाडौँ – आज बस्ने भनिएको प्रधानमन्त्री समेत रहेका नेकपा अध्यक्ष केपी शर्मा ओली समूहको स्थायी कमिटी बैठक स्थगित भएको छ । मंगलवार साँझ सर्वोच्च अदालतले संसद् विघटनको मुद्दा उल्टाइदिएपछि बुधवार ओली समूहको स्थायी कमिटी बैठक बसेर सर्वोच्चको फैसला सम्मान गर्ने निर्णय गरेको थियो ।

आज पनि बैठक जारी राखी जारी आगामी राजनीतिक अवस्थाबारे छलफल गर्ने तयारी ओली समूहको थियो ।

यद्यपि तयारी नपुगेको भन्दै बैठक स्थगित गरिएको प्रधानमन्त्रीका प्रेस सल्लाहकार सुर्य थापाले जानकारी दिएका छन् ।

बुधवार नै वैठकले १३ फागुनभित्रै संसद बैठक आह्वान गर्ने, पार्टीको अवस्थाबारे थप छलफल गर्न केन्द्रीय कमिटी तथा संसदीय दलको बैठक बोलाउने र बिभिन्न स्थानमा पूर्वनिर्धारित सभाहरुलाई निरन्तरता दिने निर्णय गरिसकेको छ ।