पुडासैनी आत्महत्या प्रकरण : उच्चस्तरीय छानबिन आयोग गठन गर्न नेता महरको माग

काठमाडौँ – नेपाली कांग्रेसका युवा नेता नैनसिंह महरले आत्महत्या गरेका पत्रकार सालिकराम पुडासैनी प्रकरणको अनुसन्धानका लागि उच्चस्तरीय छानबिन आयोग गठन गर्नुपर्ने माग गरेका छन् ।

पत्रकार पुडासैनीको आत्महत्या प्रकरण चौतर्फी सरोकारको विषय बनेकाले सरकारले छानविन आयोग गठन गरेर अनुसन्धान थाल्नुपर्ने नेता महरले बताए । उनले भने, ‘यति ठूलो सरोकारको विषय बनिसकेपछि सरकारले उच्चस्तरीय स्वतन्त्रन गरेर जाँच बुझ अगाडी बढाउनु पर्छ ।’

माउन्टेन टेलिभिजनका पत्रकार पुडासैनी यही साउन २० गते चितवनको नारायणगढस्थित होटल कङ्गारुको कोठाभित्र झुण्डिएको अवस्थामा मृत भेटिएका थिए । घटना हुनुअघि उनले पत्रकार रवी लामिछाने, उनका सहकर्मी युवराज कँडेल र अस्मिता कार्कीको नाम लिएर आफूलाई यो अवस्थामा पुर्‍याउन बाध्य बनाएको भन्दै रेकर्ड गरिएको भिडियो फेला परेको थियो ।

त्यही भिडियोलाई आधार मानेर लामिछानलेसहित तीनै जनालाई प्रहरीले गत विहीबार सोधपुछका लागि भन्दै पक्राउ गरेको थियो ।

महरले पीडितलाई न्याय दिन र निर्दोषलाई नफसाउनका लागि तथ्यपरक र पुर्वाग्रहविहीन ढंगले अनुसन्धान थाल्नुपर्ने बताए । उनले भने, ‘तथ्यपरक र पुर्वाग्रह विनाको पारदर्शी छानविनले निकालेको निष्कर्षले पुडासैनीको परिवार र रवि लामिछाने लगायतले न्याय पाउँछन् ।’