हात्तीको आक्रमणबाट मृत्यु भएकाको परिवारलाई ५० हजार राहत वितरण

इलाम– हात्तीको आक्रमणबाट मृत्यु भएका इलामको चुलाचुली गाउँपालिका–२ का ३७ वर्षीय देवीलाल राईको परिवारलाई जिल्ला वन कार्यालय, इलामले रु ५० हजार राहत उपलब्ध गराएको छ ।

जिल्ला वन अधिकृत भरतबाबु श्रेष्ठको नेतृत्वमा गएको टोलीले मृतक राईको घरमा पुगेर आइतबार किरिया खर्चबापत रु ५० हजार दिएको हो । चुलाचुली गाउँपालिकाका अध्यक्ष प्रदीपचन्द्र राई र उपाध्यक्ष निर्मला दाहालले मृतक राईका काका धनबहादुर राईलाई उक्त राहत रकम हस्तान्तरण गरे ।

गत बुधबार गाउँ छिरेको हात्तीको आक्रमणबाट राईको मृत्यु भएको थियो । मृतकको परिवारलाई राहतबापत थप रु १० लाख उपलब्ध गराउने प्रक्रिया सुरु गरिएको जिल्ला वन अधिकृत श्रेष्ठले जानकारी दिए । रासस