जनयुद्धमा बिरोध, प्रधानमन्त्री हुँदा टाईसुट, बाबुरामको जीवनमै पहिलो पल्ट दौरासुरुवाल फिट !

काठमाडौं । नयाँ शक्ति नेपालका संयोजक डा. बाबुराम भट्टराईले जीवनमै पहिलो पटक दौरा सुरुवाल लगाएको भन्दै फोटो सार्वजनिक गरेका छन् । प्रधानमन्त्री हुँदा समेत टाई सुट र सर्टमा देखिएका भट्टराईले देश अनुसारको भेष भन्दै दौरा सुरुवालमा सजिएका हुन् ।

”देश अनुसारको भेष” दौरा सुरुवाल लगाएको फोटो आफ्नो फेसबुक पेजमा राख्दै उनले भनेका छन् ”जीवनमा पहिलो पटक दौरा सुरूवाल लगाएर खसबाहुल्य कर्णाली प्रदेशमा प्रवेश गरियो ।”

भट्टराईले नेतृत्व गरेको दश बर्षे जनयुद्धमा तत्कालिन माओबादी दौरा सुरुवालको कट्टर बिरोधीका रुपमा उत्रिएको थियो ।

बिश्वभर नेपाली पोशाकका रुपमा परिचित दौरा सुरुवाल वि. सं २०६८ सालसम्म नेपालको राष्ट्रिय पोसाकका रुपमा सम्मानित थियो । तर डा. भट्टराईले आँफू प्रधानमन्त्री भएका बेला दौरासुरुवाललाई राष्ट्रिय पोसाकबाट हटाएका थिए । तर, २०७२ मा उनीसमेत सहभागी संविधानसभाले दौरासुरुवाललाई राष्ट्रिय पोशाकको मान्यता दिँदै संविधान जारी गरेको थियो ।