पशुपति शर्मालाई कांग्रेस सांसद अमरेशकुमार सिंहले आफ्नो तलबबाट २५ रुपैयाँ पुरस्कार दिने

काठमाडौँ– लोक गायक पशुपति शर्मालाई नेपाली कांग्रेसका सांसद अमरेशकुमार सिंहले आफ्नो फागुन महिनाको तलबबाट २५ हजार रूपैयाँ दिने घोषणा गरेका छन् ।

सोमबारको प्रतिनिधि सभा बैठकको शुन्य समयमा बोल्दै सांसद सिंहले शर्मालाई जनगायकको संज्ञा दिए । उनले सरकारले जनताको, गायकको भावनाको सम्मान गर्न जान्दैन भने जनताले पनि सरकारको सम्मान नगर्ने बताए । उनले दुईतिहाइको सरकारविरूद्ध यस्तो गीत गाउनुको साटो मुखमा ताला लगाएर हिँड्नुपर्ने भन्दै व्यंग्य पनि गरे। प्रतिनिधि सभा सदस्यको मासिक तलब ५५ हजार २ सय ३० रूपैयाँ हुन्छ।

यसअघि गायक शर्माको ‘लुट्न सके लुट कान्छा‘’ भन्ने बोलको गीतका शब्दका विषय विवाद भएको थियो। राजनीतिक दबाब आएको भन्दै गायक शर्माले गीत आफ्नो युट्युब च्यानलबाट हटाएका थिए। प्रमुख प्रतिपक्षी नेपाली कांग्रेसले गीत हटाउनु अभिव्यक्ति स्वतन्त्रताको विरोधमा भएको बताएको थियो।

सामाजिक सञ्जालमा पनि सत्तारूढ नेपाल कम्युनिष्ट पार्टीका नेता कार्यकर्ताले विरोध सुन्न नसकेको भन्दै आलोचना भएको थियो।