भरतमोहन अधिकारीको स्वास्थ्य अवस्थाबारे जानकारी लिन अस्पताल पुगे वरिष्ठ नेता खनाल

काठमाडौँ– नेकपाका वरिष्ठ नेता तथा पूर्व प्रधानमन्त्री झलनाथ खनालले पूर्वउपप्रधानमन्त्री तथा पूर्वअर्थमन्त्री भरतमोहन अधिकारीको स्वास्थ्य अवस्था बारे जानकारी लिएका छन् ।

पूर्वप्रधानमन्त्री खनालले शुक्रबार दिउँसो ललितपुरस्थित मेडिसिटी अस्पताल पुगेर अधिकारीको स्वास्थ्य अवस्थाबारे जानकारी लिएको उनका स्वकीय सचिव कृष्ण भट्टराईले हिमालय पोष्टलाई जानकारी दिए ।

स्वासप्रश्वास र मुटुमा समस्या देखिएपछि नेता अधिकारीलाई अस्पताल भर्ना गरिएपनि केही सुधार भएपछि अस्पतालले डिस्चार्ज गरेको थियो । तर, समस्या देखिन थालेपछि उनलाई माघ २ गते पुन: अस्पताल लगिएको थियो।

अधिकारीको अहिले मेडिसिटीको सीसीयुमा राखेर उपचार भइरहेको छ ।

भट्टराईका अनुसार उनको स्वास्थ्य अवस्था अहिले सुधारोन्मुख रहेको डाक्टरले बताएका छन् । आजै नेकपाका युवराज ज्ञवाली, अमृत बोहराले पनि अधिकारीलाई भेटेका थिए ।