रोकिएन टिपर आतंक : बालाजुमा दुर्घटना हुँदा श्रीमानको मृत्य, श्रीमती गम्भीर घाइते

काठमाडौं । काठमाडौँको बालाजु नजिक वाइपास रोडमा शुक्रबार बिहान भएको दुर्घटनामा ठेलागाडामा चिया बेच्दै आएका एकजनाको मृत्यु भएको छ भने उनकी श्रीमती गम्भीर घाइते भएकी छन् ।

बिहान पाँचबजे भएको दुर्घटनामा ठेलागाडामा चिया बेच्ने धादिङको धुनिलेखी नगरपालिकाका ५८ वर्षीय दलबहादुर बिसुंखेको मृत्यु भएको हो भने उनकी श्रीमती ५७ वर्षीया सानोनानी बिसुंखे गम्भीर घाइते भएकी छन् । उनको शिक्षण अस्पतालमा उपचार भइरहेको छ ।

दुर्घटनामा गम्भीर घाइते रहेका दलबहादुरलाई उपचारका लागि अस्पताल लैजाने क्रममा बाटोमै मृत्यु भएको प्रहरीले जनाएको छ ।

धर्मस्थलीबाट माछापोखरी हुँदै विमानस्थलमा माटो भर्ने काम गरिरहेको ना ७ ख ७००५ नम्बरको ट्रिपरले चारवटा ट्याक्सी र चिया बेच्ने ठेलागाडालाई ठक्कर दिएको थियो ।

दुर्घटना हुँदा चिया खान भन्दै ठेलागाडा नजिक राेकिएका ट्याक्सी चालकहरुले भागेर ज्यान जोगाएको प्रत्यक्षदर्शी गोबिन्द देबकोटाले बताए ।

‘म दूध लिएर आउँदै थिए, एक्कासी अनियन्त्रित भएर आएको ट्रिपरले सडक किनारमा रोकिएका चारवटा ट्याक्सी र ठेलागाडामा ठक्कर दियो, चिया खान रोकिएका चालकहरुले भागेर ज्यान जोगाए, तर चिया बनाउँदै गरेका श्रीमान/श्रीमती दुर्घटनामा परे’, देवकोटाले भने, ‘ट्रिपर चालकको गम्भीर लापर्वाही देखियो प्रशासनले कारवाही गरोस् ।’