मन्त्रिपरिषद्का निर्णय ४८ घण्टापछि सुनाइने निर्णयप्रति प्रेस युनियनको ध्यानाकर्ष

काठमाडौँ– नेपाल सरकार मन्त्रिपरिषदको निर्णय तत्काल सार्वजनिक नगरी ४८ घण्टापछि व्यवस्थित रुपमा सार्वजनिक गर्ने भनी गरेको निर्णयप्रति नेपाल प्रेस युनियनले गम्भीर ध्यानाकर्षण जनाएको छ ।

मंगलबार युनियनका महासचि अजयबाबु सिवाकोटीले जारी गर्दै सरकारले आम नागरिकले सार्वजनिक सूचना पाउने अधिकार कुन्ठित गर्न लागेको बताएका छन् ।

‘कात्तिक २५ गते साँझ बसेको मन्त्रिपरिषद् बैठकका निर्णयबारे ‘माइन्युट र प्रमाणीकरण नभएका विषयलाई निर्णयका रूपमा सार्वजनिक गरिहाल्नु उपयुक्त नहुने’ साथै ‘सञ्चारकर्मीहरुले समयक्रममा पछि थाहा पाइहाल्ने’ भन्दै सरकारका प्रवक्ता तथा सञ्चार एवं सूचना प्रविधिमन्त्री गोकुल बाँस्कोटाको अभिव्यक्तिबाट सरकार सूचनाको हक र आम नागरिकले सार्वजनिक सूचना पाउने अधिकार कुन्ठित गर्न लागेको हो भन्ने हाम्रो बुझाइ छ ।’ विज्ञप्तीमा भनिएको छ ।

जननिर्वाचित सरकारले गरेका निर्णयहरु तत्काल जान्न पाउने नागरिकको अधिकारमाथि सरकार नै बाधक बन्न खोजेको भन्दै उनले सामन्ती संस्कार तत्काल त्यागेर मन्त्रिपरिषद्का निर्णयहरु बैठक लगत्तै सार्वजनिक गर्न माग गरेका छन् ।