तलब, भत्ता नलिने इनरुवा नगरपालिकाका कांग्रेस उम्मेदवार मेहताको घोषणा

इनरुवा– सुनसरी सदरमुकाम समेत रहेको इनरुवा नगरपालिकामा नेपाली काँग्रेसबाट प्रमुख पदका प्रत्याशी राजन मेहताले इनरुवा नगर क्षेत्रका विकासका लागि सदैव लाग्ने बताएका छन् ।

नेपाली काँग्रेस इनरुवा नगर समितिले बिहीबार आयोजना गरेको घरदैलो तथा चुनावी प्रचारप्रचार अभियानका क्रममा बोल्दै प्रमुख पदका प्रत्याशी मेहताले सो कुरा बताएका हुन् । प्रमुखका उम्मेदवार मेहताले इनरुवा नगरपालिकाका सबै तहमा हाम्रो जित सुनिश्चित भइसकेको बताउनुहुँदै निर्वाचन त वैधानिकता दिने कुरा मात्र भएको बताए ।

मेहताले राजनीतिलाई आफूले व्यवसायको रुपमा नहेरेर यसलाई एउटा सेवाको रुपमा लिएको पनि बताए । नेपाली काँग्रेस काम गरेर मात्र बोल्ने पार्टी भएको भन्दै आफू प्रमुख पदमा विजयी भएपछि नगरपालिकाबाट प्राप्त हुने कुनैपनि रकम वा भत्ता नलिने घोषणा गरे ।

प्रमुखका प्रत्यासी मेहताले नेपाली काँग्रेसले इनरुवा नगरपालिकामा पार्टीको तर्फबाट युवालाई टिकट दिएको बताउँदै आफू हारे सबै युवाको हार हुने भएकाले युवाको पक्षमा लाग्न आग्रह गरे ।

उनले आफूले विजयको दिनदेखि नै इनरुवा नगर क्षेत्रमा बेथितिको रुपमा रहेको ढल सरसफाइलाई निरन्तरता दिने बताए । उनले इनरुवामा कुनै पनि बेला अनाहकमा बजार बन्द हुने गरेकाले त्यसको अन्त गर्नका लागि पहल गर्ने समेत बताए ।

उम्मेदवार मेहताले आफू विजयी भएपछि भैँसी पशुपालक कृषकलाई मध्यनजर गर्दै प्रत्येक वर्ष भैँसी सुन्दरी प्रतियोगिता गर्ने र उपाधि विजेता भैँसीपालक कृषकलाई उन्नत जातको भैँसी उपहार दिने बताएका छन् । रासस