म्याड्रिड–एन्टोनियो ग्रीजमानले दुई गोल गरेपछि एथ्लेटिको म्याड्रिडले फ्रेन्च क्लब मार्सेलाई पराजित गर्दै पछिल्ला ९ वर्षमा तेस्रो युरोपा लिगको उपाधि जित्न सफल भएको छ । यसअघि एथ्लेटिकोले सन् २०१० र २०१२ मा यो उपाधि जितेको थियो ।
ADVERTISEMENT
एथ्लेटिकोसँगै अर्को स्पेनिस क्लब सेभियाले यो प्रतियोगिता सर्वाधिक तीन पटक जितेको छ । फ्रान्सका फरवार्ड ग्रीजमानले खेलको २१ औँ मिनेटमा आन्द्रे जाम्बोको गल्तीको फाइदा उठाउँदै एथ्लेटिकोलाई अग्रता दिलाएका थिए ।
ADVERTISEMENT
खेलको दोस्रो हाफको शुरुवातमा नै उनले एथ्लेटिको अग्रता दोब्बर बनाए । खेल सकिन लाग्दा कप्तान गाबीले गोल गरेपछि एथ्लेटिकोले ३–० को सहज जित हासिल गर्यो ।
ग्रीजमानको पहिलो गोलअघि मार्सेका फरवार्ड भालेरे जर्मेनले गोल गर्ने सुन्दर अवसर गुमाएका थिए । घाइते हुँदै खेल गुमाउने आशंका रहेका मार्सेका कप्तान डिमिट्री पायेटले केवल आधा घण्टामात्र मैदानमा बिताए । उनले रुँदै मैदान छाडेका थिए ।
एथ्लेटिको म्याड्रिड पछिल्लो समय युरोपमा स्थिर प्रदर्शन गर्ने टोलीमा पर्दछ । एथ्लेटिकोले बार्सिलोना र रियल म्याड्रिडको अधिपत्य तोड्दै सन् २०१३–१४ मा ला लिगाको उपाधि जितेको थियो ।
दुईवटा च्याम्पियन्स लिगको फाइनलमा पुगे पनि एथ्लेटिको चिरप्रतिद्वन्द्वी रियलसँग पराजित भएको थियो । सन् २०१३–१४ सिजन यता स्पेनिस क्लबले पछिल्ला ९ मध्ये ८ वटा च्याम्पियन्स लिग र युरोपा लिगको उपाधि जितेको छ । यसबीचमा म्यान्चेस्टर युनाइटेडले मात्र गत सिजन युरोपा लिग जितेको थियो ।
