पूर्वराजा शाह जनता भड्काउने काम गर्दैछन् : कृष्ण सिटौला

काठमाडौँ– नेपाली कांग्रेसका नेता कृष्ण सिटौलाले पूर्वराजा ज्ञानेन्द्र शाहले नै जनता भड्काउने काम गरेको बताएका छन् ।

सोमबार राष्ट्रियसभा बैठकको बिशेष समयमा बोल्दै सिटौलाले सरकारले स–सम्मान विदाई गरेको पूर्वराजा ज्ञानेन्द्रले केहि गर्छु भनेर गाडीमा उभिएर हिँड्न खोज्नु शोभनिय विषय नभएको र जनता भड्काउने काम गरेको बताएका हुन् ।

उनले पूर्वराजाले राज्यले दिएको सम्मान ग्रहण गरेर बस्नुनै उचित हुने जिकिर गरे । तत्कालिन अवस्थामा आफु गृहमन्त्री हुँदा प्रधानमन्त्रीको प्रतिनिधिको रुपमा ज्ञानेन्द्र शाहसंग वार्ता गरेर निवास र सुरक्षा प्रबन्धको ग्यारेन्टी गरेको उनले स्मरण गरे ।

उनले जनतासामू राजनीतिक खेलाडीको रुपमा मैदानमा आए भन्न सक्नुपर्ने तर राजा आउँछ भनेर जनतालाई भड्काउने काम गर्न नहुनेमा जोड दिए । यस विषयमा राजनीतिक दृढता नआएकाले सबै राजनीतिक दल एकताबद्ध भएर उभिने बेला आएको उनको धारणा छ । सिटौलाले संविधान जारी भइसकेपछि अहिलेसम्मको अवस्थाम आइपुग्दा सबै दलले आलोपालो सरकारको नेतृत्व गरेकाले अव संविधानको कार्यान्वयनको समिक्षाा गर्ने बेला भएको बताए ।

उनले नयाँ संविधानमा रहेको मौलिक हकमा रहेका बिषयलाई प्रचलनमा ल्याउन सकेको छ वा छैन भन्ने विषयमा पनि निर्मम समिक्षा गर्ने बेला भएको उल्लेख गरे । सिटौलाले जनताको आवश्यकताका आधारमा अब संविधान संशोधन गर्न ढिलाई गर्न नहुनेमा जोड दिए ।