काठमाडौं–प्रदेश २ मा सुशासन कायम गर्न मुख्यमन्त्री मोहम्मद लालबाबु राउत गद्दीले ११ प्रतिबद्धता सार्वजनिक गरेका छन् । आइतबार पत्रकार सम्मेलन गर्दै उनले प्रदेशभित्र पूर्ण रूपमा सुशासन कायम गर्न भ्रष्टाचारविरुद्ध शून्य सहनशीलता अपनाउने, नीतिगत रूपमा गरिने भ्रष्टाचारलाई स्वीकार्य नगरिने र प्रदेशको दैनिक प्रशासनमा ढिलासुस्ती नगरी २४ घन्टाभित्रै सेवाग्राहीको काम गर्नेलगायत का प्रतिबद्धता जनाएका छन् ।
ADVERTISEMENT
मुख्यमन्त्री राउतले प्रतिबद्धता पूरा गर्न प्रदेश सभामार्फत आवश्यक कानुन बनाउने बताए । उनले भने, ‘हाम्रा यी प्रतिबद्धता कानुन निर्माण भएपछि मात्र कार्यान्वयन हुन्छ, प्रदेशका कानुन निर्माण हुन एक–दुई महिना अझै लाग्छ ।’
ADVERTISEMENT
यस्ता छन् प्रतिबद्धता
१. प्रदेशभित्र पूर्ण रूपमा सुशासन कायम गरिनेछ । भ्रष्टाचारविरुद्ध शून्य सहनशीलता अपनाइनेछ ।
२. नीतिगत भ्रष्टाचार स्वीकार्य हुनेछैन । प्रदेशको दैनिक प्रशासनमा ढिलासुस्ती सहन गरिनेछैन ।
३. सेवाग्राहीको काम कर्मचारीले २४ घन्टाभित्र पूरा गर्नुपर्नेछ । काम पूरा गर्न नसक्ने भए सेवाग्राहीलाई यथोचित कारण दिनुपर्नेछ ।
४. नागरिकको गुनासो सुन्न मुख्यमन्त्रीको कार्यालयमातहत हेलो प्रदेश सरकारको स्थापना गरिनेछ ।
५. हरेक राष्ट्रसेवक कर्मचारी भनेको जनताको सेवक हुन् भन्ने सन्देश जनतामा प्रवाहित गरिनेछ ।
६. इमेललगायत माध्यमबाट जनताले आफ्ना गुनासा सीधै मुख्यमन्त्रीको कार्यालयमा टिपाउन सक्नेछन् । त्यस्ता गुनासामा तत्काल कारबाही गरिनेछ ।
७. ‘जनतासँग मुख्यमन्त्री’जस्ता प्रत्यक्ष संवाद कार्यक्रमका लागि सञ्चारमाध्यम प्रयोग गरिनेछ ।
८. विभिन्न ठाउँमा मुख्यमन्त्री जनताको घरदैलोमा गई प्रदेश सरकारप्रति रहेका गुनासा सुन्नेछन् । ती गुनासाको सम्बोधन गर्ने प्रयास गरिनेछ ।
९. प्रदेशका जनतालाई दैनिक उपभोग्य वस्तु र सेवामा हुने कालोबजारी र मँहगी नियन्त्रण गर्न प्रभावकारी रूपमा बजार–भाउको अनुगमन गरिनेछ ।
१०. अनियन्त्रित र अवैध रूपमा भइरहेको मदिरा बेचबिखन तथा सेवनलाई आवश्यक नीति बनाई नियन्त्रित गरिनेछ ।
११. वन्यजन्तु तस्करी, प्राकृतिक स्रोत–साधन दोहन तथा वन फँडानीलाई तत्काल रोकिनेछ ।
