एसीसी प्रिमियर कप : साउदी अरेबियाद्वारा नेपाललाई ७४ रनको चुनौती

काठमाडौँ – ओमानमा जारी एसीसी प्रिमियर कप टी–२० क्रिकेट प्रतियोगितामा समूह चरणको अन्तिम खेलमा साउदी अरेबियाले नेपाललाई ७४ रनको चुनौती दिएको छ ।

ओमानको अल अमेरातस्थित क्रिकेट मैदानमा वर्षाका कारण ८ ओभरमा झारिएको खेलमा टस हारेर पहिले ब्याटिङ गरेको साउदी अरेबियाले निर्धारित ८ ओभरमा ६ विकेट गुमाउँदै ७३ रन बनाएको हो ।

साउदीलाई सम्मनजनक स्कोरतर्फ पुर्याउने क्रममा अब्दुल वाहिदले विष्फोटक ब्याटिङ गरे । उनले १६ बलमा ३ चौका र ३ छक्का प्रहार गर्दै ३७ रन बनाए । यस्तै काशिफ अब्बसले ८ तथा फैसल खानले ६ रन बनाए ।

बलिङतर्फ नेपालका लागि अविनाश बोहरा र करण केसीले समान २–२ विकेट लिए । सोक्रममा अविनाशले २ ओभरमा १५ रन खर्चिए भने करणले २ ओभरमा २१ रन दिए । यस्तै ललित राजवंशी र प्रतिश जिसीका नाममा समान १–१ विकेट रह्यो । नेपाल यसअघिका ३ वटै खेल जितेर एक खेल अगावै समूह ‘ए’को विजेताका रुपमा सेमिफाइनल प्रवेश गरिसकेको छ ।

साउदीले भने यसअघिका ३ मध्ये २ खेलमा हार र १ खेलमा जित हात पारेको छ । सेमिफाइनलमा स्थान बनाउन साउदीलाई आज जितको विकल्प छैन ।

एसीसी प्रिमियर कपमा १० टोलीले प्रतिस्पर्धा गर्दैछन् । नेपाल समूह ‘ए’मा रहेको छ । जहाँ हङकङ, कतार, मलेसिया र साउदी अरब समेत रहेका छन् । यस्तै समूह ‘बी’मा आयोजक ओमानसहित युएई, बहराइन, कुवेत र कम्बोडिया रहेका छन् ।

विजेता टोली अर्को वर्ष हुने टी–२० एशिया कपका लागि छनोट हुनेछ । यसअघिको विजेता नेपालले उपाधि रक्षा गर्दै लगातार दोस्रो पटक एशिया कपमा पुग्ने लक्ष्य राखेको छ ।