काठमाडौँ– उपप्रधानमन्त्री तथा गृहमन्त्री रवि लामिछानेलाई एमालेका सांसद रघुजी पन्तले व्यवसायी दुर्गा प्रसाईँका बडीगार्डसँग भेटिएको हतियारको विषयमा प्रश्न उठाएका छन् ।
समग्र उपत्यकाको सुरक्षाको अवस्थाबारे प्रश्न गर्दै पन्तले भने, ‘अदालतमा दुर्गा प्रसाईँलाई गार्डसँग भएको हतियार भेटियो । त्यो पनि आधुनिक । आत्म सुरक्षाको लागि त्यो स्तरको हतियार राख्न दिनु कतिको उपयुक्त हो ?’
भर्खरै रुस तथा अमेरिकाको विभिन्न शहरमा घटेको घटनाबारे स्मरण गराउँदै उनले लाइसेन्स नै दिएपनि गलत मान्छेले घटाउन सक्ने दुर्घटनाको जिम्मेवार सरकार नै रहने प्रष्ट पारे ।
‘त्यसैले योनीतिको समीक्षा गर्नुपर्ने सरकारले आवश्यक ठानेको छ कि छैन ?’, उनले भने ‘खासगरी दुर्गा प्रसाईँको हतियार कसरी दिइयो ? त्यस्तो हतियार राख्ने अनुमति कानुनी आधार छ भने त्यसलाई पनि फेर्नुपर्यो ।’
देशको सुरक्षा अवस्था बलियो बनाउन त्यस्ता हतियारको अनुमति कतिजनालाई दिइएको छ ? त्यसको संख्या र पब्लिक पर्सनल रेकर्ड राखे नराखेकोबारे प्रश्न गर्दै पन्तले उनीहरुबाट हतियार फिर्ता लिनेबारे सरकारले आवश्यक ठानेको छ कि छैन ? भन्ने प्रश्न गरे ।
यी विषय जनताको सुरक्षासंग जोडिएको गम्भीर समस्या रहेको जनाउँदै उनले भने, ‘दुर्गा प्रसाईँलाई जुन प्रकारको हतियार दिइयो त्यो हतियारको प्रकार हेर्दा हतियार दिने, लाइसेन्स दिने नीतिहरुमाथि पुर्नविचार गर्नुपर्ने र परिमार्जन गर्नुपर्ने स्पष्ट देखियो ।’
कुनै नागरिकले आफ्नो सुरक्षाका लागि हतियार नै राख्नुपर्ने अवस्था अन्त्य गर्न तथा राज्यको सुरक्षा संयन्त्रमाथि प्रश्न गर्दै उनले यस विषयमा गृहमन्त्री लामिछानेबाट जवाफ समेत मागे ।