नेकपा एमालेका नेता तथा पूर्वसांसद दिपक कार्की:
प्रदेश सभा र प्रतिनिधिसभा निर्वाचन अन्तर्गत सबै क्षेत्रको मतपरिणाम आइसकेको छ । कस्तो रह्यो अनुभव ? कसरी विश्लेषण गरिरहनु भएको छ ?
पहिलो त पार्टीले जुन वाम गठबन्धन गर्यो । झापामा पनि त्यही थियो । अझ हाम्रोमा त तृदलीय गठबन्धन थियो । राप्रपासंग पनि हामीले गठबन्धन गरेका थियौँ । चुनावी परिणाम वास्तवमा सोचेजस्तै उत्साहजनक नै आयो । मुलूकको स्थायित्वको लागि हामी जुन एजेण्डा बोकेर जनतासामू गएका थियौँ, त्यो कुरा जनताले सहज रुपमा स्वीकार गरेको पाइयो । जनता मुलूकलाई अस्थिरताबाट मुक्त गर्न चाहान्छन् भन्ने यसले प्रमाणित गर्छ । यति धेरै मतान्तरमा वाम गठबन्धनका उम्मेदवारलाई जनताले जिताए । यसले हाम्रो काँधमा एकदमै धेरै जिम्मेवारी थपिएको छ । यस संगै हामीले निर्वाचनको बेलामा , त्यो भन्दा अघि देखाएका सपनालाई पूरा गर्नका हामीसामू चुनौती पनि उत्तिकै छन् । केपी ओली प्रधानमन्त्री हुँदा उहाँले जनतालाई जुन किसिमका सपना बाड्नु भएको थियो । अब उहाँको नेतृत्वमा ती सपनालाई साकार पार्ने अवसर हामीलाई प्राप्त भएको छ । यो जनमत पार्टी एकिकरणको लागि पनि हो । आशा छ केपी ओलीको नेतृत्वमा बन्ने सरकारले ती सपना पूरा गर्छ ।
चुनाव अगाडी वाम गठबन्धनले जुन किसिमका सामुहिक एजेण्डा तय गरेको थियो । ती एजेण्डा अहिले कस्तो अवस्थामा छन् ? किनकी दुईचार दिनदेखि राजनीतिले त अर्कै मोड लिएको जस्तो देखिन्छ नि ?
यो बीचमा विभिन्न खालका कुराहरु सतहमा आए । गठबन्धनप्रति आत्तिएका साथीहरुले यो भ्रम फैलारुइरहेका छन् । तर एउटा निश्चित कुरा के हो भने हामी पार्टी एक गर्नकै लागि अगाडी बढेका छौँ । निर्वाचनमा साझा घोषणापत्र बनाएर सहभागी हुनुपनि पार्टी एकताको सन्देश नै हो । कुनैपनि हालतमा यो गठबन्धन टुट्न सक्दैन । जसले टुटाउने प्रयत्न गर्छ, त्यसलाई आगामी दिनमा जनताले बढार्नेछन् । किनकी जनता स्थिरता, विकास र स्थायित्व चाहान्छन् । समृद्ध मुलूक भएको हेर्न चाहान्छन् । यदि कसैले फेरि पनि ९ महिने सरकार बनाउनतिर जान खोज्यो वा चाहाना राख्यो भनेमात्रै पनि अहिले जसरी अहिले नेपाली कांग्रेसलाई एउटा साइजमा सिमित गरिएको छ । पाँच वर्षपछि उसको अवस्था पनि यस्तै हुनेछ । नयाँ शक्तिहरुको उदय हुनेछ । विवेकशील साझालाई नै हामी उदाहरण लिनसक्छौँ । जसको कुनै एजेण्डा, सिदान्त नभएपनि राम्रो मत पाएको छ । जनतामा राजनीतिप्रति वितृष्णा पैदा भएको यसले प्रमाणित गर्छ ।
विगत धेरै वर्षदेखि हामीले देख्दा बहुदल आएपछि गिरिजा प्रसाद कोइराला साढे ३ वर्ष प्रधानमन्त्री भए । सबैभन्दा लामो आयूको सरकार भनेकौ नै त्यही हो । बाँकी सबै एक दुई वर्षभन्दा कोही कटेको छैन । यसले मुलूकलाई समृद्धि दिन सकेन, जहिले पनि अधोगतीको बाटोमा जानुपर्यो । त्यस कारण अब राजनीतिक स्थिरता कायम गरेर मुलूकलाई समेद्धिको बाटोमा लैजानका लागि, शान्ति र सुशासनको बाटोमा लैजानका लागि, वैदेशिक लगानी भित्र्याएर रोजगारको सिर्जना गर्नका लागि हामी अगाडी बढ्नुपर्छ ।
संविधान निर्माण गर्दा तपाईपनि ६०१ सांसदमध्येको एक हुनुहुन्थ्यो । अब तपाईको व्यक्तिगत जिम्मेवारी कस्तो रहन्छ ? कसरी अगाडी बढ्नुहुन्छ ?
नेकपा एमाले पार्टीको एउटा कार्यकर्ता, एउटा सिपाही भएको नाताले पार्टीले जे जिम्मेवारी दिन्छ, त्यसको पालना गर्नु पर्छ । आफूमा आइपरेको भूमिकालाई जिम्मेवारपूर्वक निर्वाह गर्ने मेरो काम हुन्छ । गाउँ पञ्चायत हुँदै सभासदसम्मको यात्रालाई मैले पूरा गरिसकेको छु । मलाई जे जिम्मेवारी प्राप्त भए तिनको कुशलतापूर्वक, अनुशासित भएर पूरा गरेजस्तो लाग्छ । मेरो यो अवधीसम्म आफ्नो कार्यकालमा यहाँनेर कमजोरी भयो भन्ने कुरा उठ्न दिएको छैन । अबका दिनमा म पार्टीलाई बलियो बनाउने, निर्वाचन जनप्रतिनिधिलाई सहियोग गरेर उहाँहरुलाई सफन बनाउने एउटा खम्बाको रुपमा म काम गर्न चाहान्छु ।