काठमाण्डौं-कर्मचारीको असावधानीका कारण प्रदेशसभा सदस्यको मत पत्र प्रतिनिधिसभाको मतपेटिकामा खसालेपछि पश्चिम नवलपरासी जिल्लाको सरावल गाउँपालिकास्थित त्रिमुर्ती आधारभूत तिलौली केन्द्र ’ख’ मा पुनः मतदान भएको छ । बिहान सात बजेदेखि भोट खसाल्न आएका मतदाताहरूलाई त्यहाँ खटिएका कर्मचारीले प्रदेशसभाको मत पत्र दिएर प्रतिनिधिसभाको बाकसमा खसाल्न लगाएपछि केही समय मतदान प्रकृया अवरुद्ध भएको थियो ।
ADVERTISEMENT
एउटाको मत पत्र अर्कै बाकसमा खसालेपछि राजनीतिक दलका प्रतिनिधिहरुको सहमतिमा पुनः मतदान गरिएको मतदान अधिकृत वीरेन्द्र कुमार तिमिल्सेनाले बताए । १८ जनाले मतदान गरेपछि उक्त त्रुटी भएको थाहा भएको तिमिल्सेनाले बताए । राजनीतिक दलको सहमतिमा मतदान गर्ने मतदाताहरूको पहिचान गरी पुनः मतदान गर्न लगाइएको थियो । त्रुटी भएर खसालिएका सबै मतपत्रलाई मुचुल्का बनाएर छुट्टै शिल गरेर राखिएको तिमिल्सेनाले बताए ।
ADVERTISEMENT
पूर्व र पश्चिम जिल्लामा विभाजन नवलपरासीका सबै मतदान केन्द्रमा शान्तिपूर्ण रुपमा मतदान प्रकृया अघि बढेको पश्चिम जिल्लाका प्रमुख जिल्ला अधिकारी उदयबहादुर रानाले बताए । निर्वाचनका लागि दुवै जिल्लामा ५ हजार बढी सुरक्षाकर्मी परिचालन छन् ।
पूर्वी जिल्ला (नवलपुर क्षेत्र) मा २ सय ५८ मतदान केन्द्र र १ सय १२ मतदान स्थलमा कुल २ लाख २१ हजार ७ सय १६ मतदाता छन् । दुई निर्वाचन क्षेत्र रहेको त्यहाँ २० प्रतिनिधिसभा र ४२ प्रदेशसभाका उम्मेदवार प्रतिस्पर्धामा छन् । त्यसैगरी पश्चिम जिल्ला (परासी क्षेत्र) मा २ सय मतदान केन्द्र र १ सय २० मतदान स्थलमा कुल २ लाख ८ हजार २ सय ३७ मतदाता छन्।
दुई निर्वाचन क्षेत्र रहेको त्यहाँ २६ प्रतिनिधिसभा र ६३ प्रदेशसभाका उम्मेदवार चुनावी प्रतिस्पर्धामा छन् ।
