सभापति देउवाद्वारा थापाको निधनप्रति दुःख व्यक्त

काठमाडौँ– नेपाली कांग्रेसका सभापति एवम् प्रधानमन्त्री शेरबहादुर देउवाले भूतपूर्व सैनिक सङ्घ काठमाडौँ शाखाका पूर्व सभापति लीलाबहादुर थापाको निधनमा दुःख व्यक्त गरेका छन् ।

नेपाली कांग्रेस केन्द्रीय कार्यालयका मुख्यसचिव कृष्णप्रसाद पौडेलले पार्टी सभापतिका तर्फबाट आज जारी गर्नुभएको शोक विज्ञप्तिमा पार्टीका ज्येष्ठ राजनीतिज्ञ एवं तत्कालीन धापासी गाविसका सभापति थापाको निधनप्रति गहिरो दुःख व्यक्त गर्नुभएको उल्लेख गरेका हुन् ।

सभापति देउवाले स्वर्गीय थापाप्रति भावपूर्ण श्रद्धाञ्जलि अर्पण गर्नाका साथै मृतकको आत्माको शान्तिको कामना तथा शोकसन्तप्त परिवारजनमा आफ्नो र पार्टीको तर्फबाटसमवेदना पनि प्रकट गरेका छन् ।

टोखा नगरपालिका–४ निवासी थापाले कांग्रेसको सङ्गठन निर्माण र नेपालको लोकतान्त्रिक आन्दोलनमा सक्रिय भूमिका निर्वाह रहेको जनाइएको छ । उनको निधनले कांग्रेसले एक अग्रज र अनुभवी व्यक्तित्व गुमाएको बताइएको छ । रासस