ए डिभिजन लिग : आर्मीले निकाल्यो पहिलो जित, ब्रिगेड ब्वाइज १-०ले स्तब्ध

काठमाडौँ – विभागीय टिम त्रिभुवन आर्मी क्लबले राजधानीमा जारी सहिद स्मारक ए डिभिजन लिग फुटबलमा पहिलो जित निकालेको छ ।

आइतबार भएको खेलमा ब्रिगेड ब्वाइज क्लबलाई १–० गोल अन्तरले पराजित गर्दै आर्मीले पहिलो जित निकालेको हो । त्रिपुरेश्वरस्थित दशरथ रंगशालामा आर्मीलाई जित दिलाउन कप्तान भरत खवासले निर्णायक गोल गरे । खेलको ८५ औं मिनेटमा कप्तान भरतले निर्णायक गोल गर्दै आर्मीलाई १–० को अग्रता दिलाए ।

यस जितसँगै आर्मीले ३ खेलमा ५ अंक जोडेको छ । आर्मी चौंथो स्थानमा उक्लिएको छ । ब्रिगेड ४ अंक जोडेर सातौं स्थानमा रहेको छ । खेलको म्यान अफ दि म्याच भरत खवास चुनिए ।