मुस्ताङ – पितृपक्षको विधिवत् रुपमा आज समापन हुँदैछ । देशभरका विभिन्न तीर्थहरुमा सोह्रश्राद्धको अन्तिम दिन आज औँसी नै तिथि भएका, छुटेका र रोकिएका पितृहरुको श्राद्ध गरिँदैछ ।
ADVERTISEMENT
सोह्रश्राद्धको अन्तिम दिन औँसी तिथिमा श्राद्ध गर्नका लागि मुस्ताङको कागबेनी भरिभराउ भएको छ । जोमसोमदेखि कागबेनी आसपासका होटल तथा रेष्टुरेन्टमा सर्वसाधारणको चाप बढेको छ । धार्मिक तीर्थस्थल बारागुङ मुक्तिक्षेत्र गाउँपालिकाको कागबेनी श्राद्धस्थलमा सर्वसाधारणको भिड लागेको हो ।
ADVERTISEMENT
दशैंअघि सोह्रश्राद्धको औँसी तिथि पारेर कागबेनीमा पिण्डदान गर्नाले मोक्ष प्राप्ति हुने जनविश्वास छ । मुस्ताङ बाहिरका सर्वसाधारण सोह्रश्राद्ध सुरु भएदेखि नै सो क्षेत्रमा प्रवेश गर्न थालेका थिए । औंशीमा भने श्राद्धका लागि कागबेनी पुग्नेहरु धेरै नै भएको मुस्ताङका प्रमुख जिल्ला अधिकारी श्रीनाथ पौडेलले जानकारी दिए । ‘‘अन्य वर्षमा जस्तो यस वर्ष छैन, कोरोना महामारीका कारण केही कडाइ गरिएको छ तर पनि मानिसको भीड छ’’, उनले भने, ‘‘यहाँ आउनका लागि कोरोना खोप लगाएको वा तत्कालै कोरोना नेगेटिभ भएको हुनुपर्नेछ ।’’ मङ्गलबार दिउँसै १०० बढी गाडी मुस्ताङ भित्रिएको उनले बताए ।
कागबेनी श्राद्धस्थल अन्य तीर्थस्थल भन्दा उत्तम भएकाले यहाँ श्राद्ध गर्न जानेको सङ्ख्या ठूलो रहेकोे कागबेनी क्षेत्रका संरक्षक ऋषि प्रपन्नाचार्यले जानकारी दिए । कागबेनी धार्मिकस्थल भगवान विष्णुलगायत सबै देवको बासस्थान भएको जनविश्वास छ । स्वामी उनका अनुसार शालिग्राम भगवानको शरीरमा मुक्तिनाथ भगवान रहेकाले यहाँ श्राद्ध, तर्पण, स्नान र भोजन गर्नाले मोक्ष प्राप्त हुने पद्यपुराण र वराहपुराणलगायतका ग्रन्थमा उल्लेख छ ।
कागबेनी श्राद्धस्थलमा बर्सेनि बडादशैं र चैतेदशैं सोह्रश्राद्ध औँसीमा श्रद्धालु तीर्थयात्रीको भिड लाग्ने गरेको छ । कागबेनीमा श्राद्ध गरेपछि बुधबारै फर्कनेको ताँती लाग्छ । यसरी फर्केका अधिकांशले घटस्थापनाको दिन बागलुङकालीका दर्शन गरेर गन्तव्यमा लाग्ने गरेका छन् । घटस्थापनामा बागलुङमा निकै भिड लाग्ने गर्छ । रासस
