काठमाण्डौं-गोरखाको भिमसेन गाउँपालिकामा कांग्रेस र माओवादी केन्द्रका कार्यकर्ताबीच झडप हुँदा ३ जना घाइते भएका छन् । भिमसेन गाउँपालिकाको नाम परिवर्तन गर्ने विषयमा दुई समूहबीच झडप भएको हो । गाउँ सभाको बैठकपछि दुई पक्षबीच विवाद हुँदा भिमसेन– ५ बगुवामा खुकुरी प्रहार भएको प्रहरीले जनाएको छ । घाईतेहरुको टाउकोमा गम्भीर चोट लागेको प्रहरीले जनाएको छ । घाईतेको उपचारका लागि सदरमुकाम लगिएको छ । गाउँ सभाले भिमसेन गाउँपालिकाको नाम भिमसेन थापा गाउँपालिका राख्ने निर्णय गरेको छ । बगुवा रहेको केन्द्र वडा नम्बर १ को घ्याम्पेशाल सार्ने विषयमा दुई पक्षबीच विवाद भएको हो । कांग्रेसका कार्यकर्ताले केन्द्र घ्याम्पेशाल सार्ने र माओवादी केन्द्रका कार्यकर्ताले बगुवामा नै राख्नु पर्ने बताए पछि उनीहरुबीच झडप भएको प्रहरीले जनाएको छ । झडप पछि सदरमुकामबाट घटना स्थलमा प्रहरी परिचालन गरिएको प्रहरी नायब उपरिक्षक भेषराज रिजालले बताए । आक्रमणकारीको खोजी भईरहेको प्रहरी नायब उपरिक्षक रिजालले बताए । – कान्तिपुरबाट
ADVERTISEMENT
