काठमाडौँ–उपप्रधान एवम् सङ्घीय मामिला तथा स्थानीय विकासमन्त्री कमल थापाले कुनै हालतमा स्थानीय तहको निर्वाचन हुने बताएका छन् ।


ADVERTISEMENT


रिपोर्टर्स क्लब नेपालले आज आयोजना गरेको साक्षात्कारमा निर्वाचनको काम युद्धस्तरमा भइरहेको बताउँदै उनले निर्वाचन हुने/नहुने भन्नेबारे शङ्का उपशङ्का नगर्न आग्रह गरे। उनले भने–“सरकार निर्वाचनका लागि जुटिरहेको छ निर्वाचन निश्चित रुपमा हुन्छ, सबै दलका नेता तथा कार्यकर्ताहरु निर्वाचनका लागि जुट्नुहोस् ।”


ADVERTISEMENT

# # #


उनले निर्धारित समयमा स्थानीय तहको निर्वाचन गर्नका लागि आफू सरकारमा सहभागी भएको बताउँदै सरकारले संसद्मा ल्याएको संविधान संशोधन विधेयकलाई यथास्थितिमा सहयोग नगर्ने स्पष्ट पारे ।

उपप्रधानमन्त्री थापाले संविधान जारी भएपछि पहिलोपटक २० वर्षपछि स्थानीय तहको निर्वाचन हुन लागेको भन्दै यो निर्वाचनमा कुनै पनि दल वञ्चित हुन नहुने बताए । उनले भने – “मधेसकेन्द्रित आन्दोलनरत दलहरुलाई पनि निर्वाचनमा सहभागी गराउने वातावरण बनाउनुपर्छ ।”

राप्रपाका अध्यक्षसमेत रहेका थापाले लामो समयदेखि काम गरेको राप्रपालाई छाड्नु डा प्रकाशचन्द्र लोहनीको कदम आत्मघाती भएको बताए । उनले भने–“पार्टीभित्र चित्त नबुझेका कुरा छलफल गरेर अगाडि जान सकिन्थ्यो तर पार्टी छोड्नु राम्रो काम होइन ।” डा लोहनीले पार्टी छाड्दैमा राप्रपालाई कुनै फरक नपर्ने उनको भनाइ छ ।

निर्वाचनको वातावरण बनाउने जिम्मा राजनीतिक दलको हो : प्रमुख निर्वाचन आयुक्त डा यादव

प्रमुख निर्वाचन आयुक्त डा अयोधिप्रसाद यादवले निर्वाचनको वातावरण बनाउने जिम्मा राजनीतिक दलको रहेको बताएका छन् ।

आज आयोजना गरेको साक्षात्कारमा राजनीतिक सहमतिमा निर्वाचनको वातावरण बनाउने जिम्मा दलको रहेको बताएका हुन् ।

निर्वाचनको वातावरण बने तोकिएकै मितिमा निर्वाचन हुने बताउँदै डा यादवले भने, “तोकिएकै मितिमा स्थानीय तहको निर्वाचनका लागि चाहिने सबै ऐन कानुन आयोगलाई प्राप्त भएकाले आयोगले तीव्र गतिमा काम गरिरहेको छ ।”

उनले भने, “मतदाता नामावलीलाई अन्तिम चरण पुगेको छ, मतदाता केन्द्र कति ठाउँमा राख्ने, कुन जिल्लामा कति दल छन् त्यो आधारमा मतपत्र छाप्ने काम, कर्मचारी व्यवस्थापनको काम अगाडि बढाएका छौँ ।”

प्रमुख आयुक्त डा यादवले स्थानीय तहको कर्मचारी व्यवस्थापनका लागि मुख्यसचिव, सामान्य प्रशासन मन्त्रालयका सचिव, सङ्घीय मामिला तथा स्थानीय विकास मन्त्रालयका सचिवलाई बोलाएर चैत पहिलो हप्तासम्म कर्मचारी खटाउन निर्देशन दिइसकेको जानकारी दिए । उनले निर्वाचनको सुनिश्चितताका लागि राजनीतिक दलभित्र सहमतिको खाँचो रहेको बताउँदै निर्वाचनमा सबै दलको प्रतिनिधित्व होस् भन्ने आयोगले चाहेको बताए ।

दुई दशकपछि स्थानीय तहको निर्वाचन हुन लागेकाले यसलाई सबैले उत्सवका रुपमा लिनुपर्ने यादवको भनाइ थियो । उनले स्थानीय तहको निर्वाचनमा एक करोड ४० लाखभन्दा बढी मतदाता रहेको उल्लेख गरे ।