‘ओलीसँग मिल्ने सम्भावना समाप्त भयो’

काठमाडौँ – नेकपामा आएको विवादपछि सन्तुलित रुपमा एकतातर्फ लागेका नेकपा एमालेका उपाध्यक्ष बामदेव गौतम अन्ततः प्रधानमन्त्री केपी शर्मा ओलीको विरुद्धमा उभिने भएका छन् । बामदेव नेकपामा विवाद निम्तिएपछि प्रचण्ड–नेपाल पक्ष र ओली दुबै समूहतर्फ लागेका थिएनन् । सर्वोच्च अदालतले नेकपा एमाले र माओवादी केन्द्र ब्युँताइदिएपछि उनी एमाले संगठित गर्ने अभियानमा लागेका थिए ।

तर शुक्रवार प्रधानमन्त्री ओलीले महासचिवबाहेकका सबै पदाधिकारीलाई स्वैच्छाचारी ढंगले हटाएपछि बामदेव आक्रोशित बनेका छन् । बामदेवलाई उद्धृत गर्दै उनका प्रेश सल्लाहकार विश्वमणि सुवेदी लेख्छन्,‘केपी ओलीसँग मिल्ने र उहाँसँगै जाने सबै सम्भावना समाप्त भयो ।’ उनले अगाडि लेखेका छन्, ‘सञ्चारकर्मी साथीहरू, यो उहाँको आधिकारिक धारणा हो ।’

अध्यक्षका नाताले ओलीले सबैलाई मिलाएर जानुपर्नेमा एकलौटी निर्णय गरेको भन्दै बामदेवले एमाले फुटाउने तयारी गरेका हुन् ।
यता प्रचण्ड समूहमा लागि एमाले वरिष्ठ नेता माधव कुमार नेपालले पनि ओलीविरुद्ध संघर्ष गर्ने बताएका छन् ।