वाग्मती– प्रदेशका मुख्यमन्त्री डोरमणि पौडेलले प्रदेश सरकारले सुरक्षा निकायको मनोबल बढाउन कुनै कसर बाँकी नराख्ने भनाई व्यक्त गरेका छन् । नेपाल प्रहरीको सशस्त्र प्रहरी गण रातोमाटे, हेटौँडामा वाग्मती प्रदेश सरकारले निर्माण गरेको दुई तले भवनको उद्घाटन गर्दै मुख्यमन्त्री पौडेलले सो धारणा व्यक्त गरेका हुन् ।
ADVERTISEMENT
उनले सो कार्यक्रममा सरकारले प्रदेशका विभिन्न स्थानमा प्रहरीका लागि ४६ भवन निर्माण भइरहेको जानकारी समेत दिएका छन् । करीब आधा भवन निर्माण सम्पन्न भएको र अन्य आगामी असारसम्ममा सम्पन्न हुने उनको भनाई छ। उनले प्रहरीका लागि गाडी उपलब्ध गराउने प्रक्रियासमेत प्रारम्भ भएको बताएका छन् ।
ADVERTISEMENT
कार्यक्रममा प्रदेशका आन्तरिक मामिला तथा कानून मन्त्रालयका सचिव मदन भुजेलले प्रदेश सरकार प्रहरीको चुस्त व्यवस्थापनमा जुटेको बताए । यस्तै, उद्घाटन कार्यक्रमको समापन गर्दै वाग्मती प्रदेश प्रहरी कार्यालयका प्रमुख प्रहरी नायब महानिरीक्षक वसन्तकुमार लामाले भने, नवनिर्मित भवनमा १ सय २५ प्रहरीलाई व्यवस्थित रुपमा राख्न सकिने जानकारी दिए ।
आन्तरिक मामिला मन्त्रालयका अनुसार, मकवानपुरमा ७, काभ्रेपलाञ्चोक र सिन्धुलीमा ६/६, चितवन र रामेछापमा ५/५, रसुवा र दोलखामा चार र धादिङ, नुवाकोट र सिन्धुपाल्चोकमा तीन तीन प्रहरी भवन निर्माण भइरहेका छन् । भवन निर्माणका लागि सबैभन्दा बढी मकवानपुर जिल्लामा रु. १८ करोड २१ लाख ९६ हजार छुट्टाइएको छ ।
मकवानपुरमा जिल्ला ट्राफिक प्रहरी कार्यालयको भवन, इलाका प्रहरी कार्यालय ठिङ्गन, प्रहरी चौकी कान्द्राङ, प्रहरी चौकी रातोमाटे, प्रहरीचौकी डाँडाखर्क, प्रहरी चौकी हात्तीसुँडे, सशस्त्र प्रहरी गण रातोमाटेमा भवन निर्माण भएका हुन् । त्यसैगरी चितवनमा रु नौ करोड ९१ लाख ९१ हजार, सिन्धुलीमा रु १२ करोड ८९ लाख ७० हजार, धादिङमा पाँच करोड ९५ लाख ४१ हजार रकम छुट्टाइएर निर्माणको काम अन्तिम चरणमा पुगेको छ ।
त्यसैगरी, नुवाकोटका लागि रु १० करोड ५८ लाख ३३ हजार, दोलखाका लागि सात करोड १४ लाख २२ हजार रहेको छ । रामेछापका लागि रु १२ करोड ४९ लाख ९१ हजार, रसुवाका लागि १४ करोड ९५ लाख २० हजार र सिन्धुलीका लागि सात करोड ८२ लाख ८२ छुट्टाइएको मन्त्रालयले जनाएको छ । रासस
