काठमाडौँ – दुई वर्षअघि खुला प्रतिस्पर्धाबाट नेपाल आयल निगमको कार्यकारी निर्देशकमा नियुक्त भएका सुरेन्द्र पौडेलले आफ्नो चमत्कारी नेतृत्व देखाउन थालेका छन् । पौडेलले निरन्तर नोक्सानमा गइरहेको निगममा आएकै वर्ष नाफा वृद्धि गराएका थिए । आर्थिक वर्ष २०७२/७३ मा निगमको नाफा १९ अर्ब ३६ करोड रुपैयाँ थियो । त्यसपछिको वर्ष निगमले ९ अर्ब मात्र नाफा कमाएकोमा आव २०७४/७५ मा नाफा ३ अर्बमा सीमित भएको थियो ।
ADVERTISEMENT
आर्थिक वर्ष २०७५/७६ को मध्यमा निगममा आएका पौडेलले आएको आधा वर्षमै निगमको नाफा वृद्धि गर्दै वार्षिक नाफा ८ अर्ब ७५ करोड पुर्याएका थिए । अघिल्लो आर्थिक वर्ष २०७६/७७ मा पौडेलको नेतृत्वमा निगमले १२ अर्ब ८७ करोड नाफा कमाएको छ । कोभिड–१९ भाइरसको प्रभावले इन्धन खपत कम हुँदा पनि निगमले १२ अर्ब ८७ करोड नाफा कमाउन सफल भएको हो । निगमले आइतबार सार्वजनिक गरेको अन्तिम लेखा परीक्षण प्रतिवेदनअनुसार, मोतिहारी–अमलेखगन्ज पेट्रोलयम पाइपलाइनबाट इन्धन आयात गरी ढुवानी रकम बचत हुनुका साथै अघिल्ला वर्षको नाफा रकमको ब्याज आम्दानी बढेपछि निगमको नाफा बढेको हो ।
ADVERTISEMENT
निरन्तर निगमको सुधारका लागि खटिएका पौडेलले मुख्यतया चार परियोजनालाई अघि बढाएका छन् । नीति तथा कार्यक्रम र बजेटले समेत सधैँ प्राथमिकतामा राख्दै आएको आमलेखगञ्जदेखि चितवनको लोथरसम्म पेट्रोलियम पाइपलाइन, भारतको सिलगुढीदेखि झापाको चारआलीसम्म पेट्रोलियम पाइपलाइन तथा चितवन, झापा र सर्लाहीमा पेट्रोलियम पदार्थको भण्डारण र झापा र धनुषामा ग्यास बोटलिङ प्लान्ट निर्माण गर्ने परियोजनालाई निगमले अघि बढाएको छ ।
मोतीहारीदेखि अमलेखगञ्जसम्म आइपुगेको पाइपलाइनलाई लोथरसम्म विस्तार गर्न पाइप कहाँबाट कसरी बिछ्याउने भन्ने सर्भे सकिएको छ । अहिले जग्गाको लेआउट, माटोको परीक्षणलगायतका काम हुँदै छन् । यो परियोजना आउँदो मंसिरबाट निर्माण सुरु गर्ने लक्ष्य राखिएको छ । गत २४ भदौदेखि सञ्चालनमा आएको मोतीहारी–अमलेखगञ्जमा पाइपलाइनबाट अहिले डिजेल मात्र आयात भइरहेको छ । तर, लोथरसम्म निर्माण सम्पन्न भएपछि एउटै पाइपबाट पेट्रोल, डिजेल, मट्टीतेल र हवाई इन्धन आयात हुनेछ ।
भारतको सिलगुढीदेखि झापाको चारआलीसम्म पेट्रोलियम पाइपलाइन परियोजनाको प्रारम्भिक लागत अनुमान निकालिएको छ र अन्य विषयको प्रारम्भिक अध्ययन अन्तिम चरणमा पुगेको छ । त्यहाँ निगमले जग्गा पहिले नै किनिसकेकाले माटोको परीक्षण, जग्गाको लेआउटलगायतका विषयमा अध्ययन गर्ने सर्भे टोली खटिएको छ ।
चितवन, झापा र सर्लाहीमा पेट्रोलियम पदार्थको भण्डारण गृहको निर्माणका लागि चितवनमा सर्भे सकिएको छ । त्यहाँ २३ बिघा १२ कट्ठा जग्गा किनिएको छ भने झापाको सर्भे अन्तिम चरणमा छ । त्यहाँ २४ बिघा जग्गा किनिएको छ । चितवनमा ९० हजार किलोलिटर क्षमताको भण्डारण गृह निर्माण गर्न लागिएको हो । यहाँ ग्यासबाहेक सबै पेट्रोलियम पदार्थ भण्डारण गृह बन्नेछ । देशको मध्यभागमा रहेकाले सबैभन्दा ठूलो भण्डारण गृह निर्माण गर्ने योजना छ । आगामी मंसिरबाट निर्माण सुरु गर्ने लक्ष्य राखिएको छ ।
झापा र धनुषामा ग्यास बोटलिङ प्लान्ट निर्माण गर्ने विषयमा दुवै ठाउँमा तीन–तीन हजार हजार मेट्रिक टनको ग्यास भण्डारण गृह निर्माण गरिनेछ । बोलपत्रमार्फत अन्तर्राष्ट्रियस्तरका दुईवटा परामर्शदाता छनोट भइसकेका छन् र उनीहरूसँग आर्थिक प्रस्ताव मागिएको छ । यहाँ भण्डारण भएको ग्यास सबै उद्योगीलाई वितरण गरिनेछ । दुवै ठाउँमा निगमले आफ्नै बोटलिङ प्लान्टसमेत राखेर पहिलोपटक आयल निगमको ब्रान्डमा ग्यास सिलिन्डर बजारमा ल्याउनेछ ।
अघिल्लो वर्ष मात्र पौडेलले कुल १ सय अंकभारको कार्यसम्पादन मूल्यांकनमा सर्वोत्कृष्ट ९२ नतिजा प्राप्त गरेका थिए । उद्योग वाणिज्य तथा आपूर्ति मन्त्रालयका सचिव बैकुण्ठ अर्याल संयोजकत्वको कार्यसम्पादन मूल्यांकन समितिले उनको एक वर्षको कार्य प्रगति अध्ययन गरी ९२ अंक दिएको थियो ।
