हिमालयन बैंकद्वारा सिद्धि स्मृति प्रतिष्ठानलाई साढे ६ लाख बढीको सहयोग

काठमाडौँ – हिमालयन बैंक लिमिटेडले भक्तपुर उपमहानगरपालिका, भिमसेनस्थान–७ स्थित “सिद्धि स्मृति प्रतिष्ठान “सिद्धि स्मृति महिला तथा बाल अस्पताल एवं बृद्धाश्रम” लाई सहयोग प्रदान गरेको छ ।

आफ्नो संस्थागत सामाजिक उत्तरदायित्व अन्तर्गत बैँकले प्रतिष्ठानलाई पाँच लाख मूल्य बराबरको ५० किलो क्षमताको लुगा धुने मेसिन र १५ किलो क्षमताको हाइड्रो एक्सट्र्याक्टर प्रदान गरेको हो ।

प्रतिष्ठानले बिरामी तथा अस्पतालका अन्य लुगाहरु दैनिक रुपमा धुनु र सुकाउनु पर्ने तर हाल रहेको मेसिन विग्रिने र पटक–पटक बनाई राख्न पर्ने समस्या व्यहोरी रहेकाले बैँकले उक्त सहयोग गरेको छ । यस्तै बैँकले प्रतिष्ठानको लागि १ लाख ५७ हजार ६३५ रुपैयाँ बराबरको १० हजार थान ओपिडी बुक पनि सहयोग स्वरुप प्रदान गरेको छ ।

बैंकका तर्फबाट बैंकका प्रमुख कार्यकारी अधिकृत अशोक शम्सेर राणाले बैंकका उच्चपदस्थका कर्मचारीहरुको उपस्थितिमा उक्त सहयोग सामग्रीहरु प्रतिष्ठानलाई एक समारोहका बीच हस्तान्तरण गरे ।

वि.सं. २०५९ मा स्थापित उक्त अस्पताल भक्तपुर क्षेत्रकै प्रतिष्ठित अस्पताल हो । अस्पतालले विशेषतः बाल स्वास्थ्य, प्रसुति तथा स्त्रीरोग सम्बन्धि सेवा प्रदान गर्दै आएको छ । विभिन्न स्वदेशी तथा विदेशी दाताहरुको सहयोगमा संचालित यस प्रतिष्ठानले अस्पालका साथै बृद्धाश्रम समेत संचालन गरिरहेको छ ।