काठमाडौं । नेपाल दलित विद्यार्थी संघको संयोजनमा उपत्यकाका ३ सय दलित परिवारले पाएका छन् । नेपाली कांग्रेस निकट दलित विद्यार्थी संघको नेतृत्वमा उपत्याकामा बिहीबार राहत वितरण गरिएको हो ।
संघका केन्द्रीय अध्यक्ष राजु सुनारले लकडाउनका कारण दैनिकी चलाउन समस्यामा परेका दलित व्यक्ति तथा परिवारलाई तत्कालको खाँचो टर्ने गरी राहत उपलव्ध गराइएको बताए । संघको केन्द्रीय समितिले केही दिन अघि लकडाउनका कारण दलित समुदायका कोही काठमाडौंमा समस्यामा परे सम्पर्क गर्नु भनेर पदाधिकारी तथा सदस्यको नाम र नम्बर नै सार्वजनिक गरेको थियो । यसपालिको राहत वितरणमा टेगार फाउण्डेसन नेपालले प्रमुख सहयोग गरेको छ । १ बोरा चामल, ५ केजी दाल, २ लिटर तेल र नुन लगायतका सामग्री प्रत्येकलाई उपलव्ध गराइएको छ । यो अभियानमा स्यम्बु लामा समूहको पनि विशेष योगदान रहेको सुनारले जनाए । यही अभियान अन्तर्गत जोरपाटीमा खाना खुवाइदै गरेको ठाउँमा पनि १० बोरा चामल, ५० केजी दाल, २० लिटर तेल, नुन र अन्य सामग्री उपलव्ध गराइएको छ । गोकर्णेश्वर नगरपालिका वडा नम्बर ५ का वडाध्यक्ष नारायणबहादुर सुवेदीको नेतृत्वमा बुधबारबाट दिनमा २ छाक जोरपाटीमा निःशुल्क खाना खुवाइदैछ ।
राहत वितरणमा नेपाल दलित संघ केन्द्रीय समितिले पनि सहकार्य गरेको थियो । पूर्वमन्त्री तथा सांसद मीन विश्वकर्मा, हरिशरण नेपाली, दीपक सोनी, सुवास बराइलीलगायतले पनि समन्वय गरेकामा सुनारले आभार व्यक्त गरेका छन् । लकडाउनका कारण खान नपाएर कोही पनि समस्यामा नपरोस् भनेर अभियान चलाएको सुनारको भनाई छ । सुनारको नेतृत्वमा नै यसअघि गोकर्णेश्वर र बुढानिलकण्ठका २ वटा वालगृहमा प्रत्येकलाई ५ बोरा चामल, दाल, तेल , चिनीलगायतका सामग्री वितरण गरिएको थियो ।
ADVERTISEMENT
