लोकसेवाको विज्ञापनबारे प्रधानमन्त्री स्वदेश फर्किएपछि निर्णय गर्छौँ : प्रचण्ड

काठमाडौँ – नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डले लोक सेवाले स्थानीय तहका लागि गरेको विज्ञापनबारे प्रधानमन्त्री स्वदेश फर्केपछि निष्कर्षमा पुग्ने उनले बताएका छन् ।

गृह जिल्ला चितवनमा बुधबार पत्रकारहरूसँगको कुराकानीमा प्रचण्डले यस विषयमा अध्ययन गरेर निर्णय गर्ने बताए । ‘समितिले एक ढंगले निर्देशन गर्‍यो । सरकारले एक खालले आफ्नो भनाइ राखिराखेकै छ ।’ उनले भने, ‘प्रधानमन्त्रीजी आएपछि छलफल गरेर सकारात्मक निष्कर्षमा पुग्छौं ।’

यस्तै उनले सरकारले राम्रो तयारी नगरी विधेयकहरू ल्याएकोले विरोध भएको भन्दै मिडिया काउन्सिल विधेयक, गुठी विधेयक परिमार्जन हुने बताए।

सरकारले ल्याएका विधेयकको विरोध भइराखेका छन्, सरकारले विधेयक ल्याउन नजानेको कि नागरिकले नबुझेको ? भन्ने प्रश्नमा जवाफ दिँदै अध्यक्ष प्रचण्डले भने, ‘तयारी राम्रो नपुगेको। जति गृहकार्य भएर विधेयक आउनु पर्ने हो त्यसमा केही कमीकमजोरी भए। सरकार र पार्टी यसमा सतर्क भएको छ।’

आउने दिनमा विधेयकमाथि पर्याप्त छलफल गरी सहमतिबाटै अघि बढ्ने उनको भनाइ छ। ‘मिडिया काउन्सिल र गुठी विधेयकलाई आवश्यक परिमार्जन गरेरै अघि बढाउनुपर्छ,’ उनले भने।

धुर्मुस सुन्तली फाउन्डेसनले भरतमा बनाइरहेको गौतमबुद्ध अन्तराष्ट्रिय क्रिक्रेट रंगशाला निर्माणका लागि सरकारले पनि सहयोग गर्ने उनको भनाइ छ। चन्दाबाट मात्रै रंगशाला बन्ने अवस्था नदेखिएकोले सरकारले प्रोत्साहन गर्ने नीतिगत निर्णय भइसकेको दाहालले बताए।