चुडामणि शर्मा लगायत तीन जनाविरुद्धको मुद्दा समय अभावका कारण दर्ता हुन सकेन

काठमाडौँ– अख्तियार दुरुपयोग अनुसन्धान आयोगले कर निर्धारणका क्रममा अर्बौ रकम अपचलन गरेको अभियोगमा निलम्बित आन्तरिक राजस्व विभागका महानिर्देशक चुडामणि शर्मासहित ३ जनाविरुद्ध गर्ने भनिएको भ्रष्टाचार मुद्दा दर्ता सरेको छ ।

अख्तियारले दर्ताका लागि विशेष अदालतमा लगेपनि समय अभावका कारण सो मुद्दा दर्ता सरेको हो । मुद्दा दर्तापछि अदालतबाटै आदेश गराउनु पर्ने भएकाले समय अभावको कारण मुद्दा दर्ता हुन नसकेको विशेष अदालतले जनाएको छ । मुद्दा साउन १ गतेलाई सरेको छ ।

अख्तियारको बिहीबार बसेको बैठकले शर्मासहित कर फस्र्योट आयोगका अध्यक्ष लुमध्वज महत र सदस्य उमेश ढकालविरुद्द १० अर्ब ९६ करोड बिगो माग दावी गर्ने निर्णय भएको थियो ।

कर फस्र्यौट गर्ने क्रममा करिब २१ अर्ब रुपैयाँ भ्रष्टचार गरेको आरोपमा अख्तियारले बिभागका पदाधिकारीमाथि अनुसन्धान अघि बढाएको हो ।

अख्तियारले शर्मालाई गत जेठ १९ देखि नियन्त्रणमा लिएको छ भने महत र ढकाल देशबाहिर लुकेको बताइएको छ ।