‘भ्वाइस अफ नेपाल’को अडिसनका लागि २२ हजारले दिए आवेदन

काठमाडौं– गायनमा प्रतिभा खोज्ने रियालटी शो ‘द भ्वाइस अफ नेपाल’ सिजन–२ मा आफ्नो प्रतिभा देखाउन झण्डै २२ हजार नेपालीले डिजिटल अडिसनमार्फत् सहभागिता जनाएका छन् । चैत १० गतेसम्म तोकिएको समय सीमाभित्र कुल २१ हजार ७ सय प्रतिभाहरुले विभिन्न डिजिटल प्लेटफर्ममार्फत आवेदन दिएको कार्यक्रमका निर्देशक लक्ष्मण पौडेलले जानकारी दिए ।

‘यसपटक हामीले मोबाइल एपसँगै सामाजिक सञ्जाल र म्यासेजिङ एपमार्फत् पनि आवेदन खुल्ला गरेका थियौं’ पौडेलले भने ‘सवै माध्यम खुल्ला गरिएका कारण यो बर्ष उत्साहजनक सहभागिता देखिएको छ ।’

एप डाउनलोड गरेर सहभागिता जनाउन कठिनाई महसुस गर्ने प्रतिभाहरुले फेसबुक म्यासेन्जर, भाइबर, ह्वाटसएपमार्फत् पनि हजारौंको संख्यामा आवेदन दिएका छन् । चैत १० मै म्याद सकिए पनि अझै दैनिक सयौंको संख्यामा आवेदन आइरहेको निर्देशक पौडेलले बताए ।

हिमालय टेलिभिजनले एचडी सेवा शुभारम्भसँगै गत माघ १ गतेबाट सुरु भएको डिजिटल अडिसनमा सहभागी हुने समय चैत १० गतेसम्म तोकिएको थियो । यही असारबाट प्रसारण सुरु हुने दोस्रो सिजनलाई हिमालय टेलिभिजन एचडीले प्रसारण गर्नेछ । यस अगाडिको श्रृंखला कान्तिपुर टेलिभिजनबाट प्रसारण गरेको थियो ।