पोखरा– संस्कृति, पर्यटन तथा नागरिक उड्डयनमन्त्री रविन्द्र अधिकारीले नेपाल सरकार थप छ वटा जहाज ल्याउने योजनामा रहेको बताएका छन् ।
ADVERTISEMENT
‘बुकवर्म फाउण्डेशन र र्याण्डम रिडर्स सोसाइटीद्वारा पोखरामा आयोजित सातौँ नेपाल साहित्य महोत्सव अन्तर्गत ‘किन घुम्ने नेपाल’ विषयक सम्वाद कार्यक्रममा उनले नेपालमा बाह्य प्रर्यटक भित्र्याउनका लागि र नेपाल एयरलाइन्सको बजार विस्तार गर्नका लागि सरकारले थप छ वटा जहाज ल्याउन खोजिरहेको बताएका हुन् ।
ADVERTISEMENT
‘नेपाल एयरलाइन्सको प्रगतीलाई रोक्नु भनेको नेपालको पर्यटन क्षेत्रको विकासलाई रोक्नु हो । त्यस कारण हामीसंग अहिले चारवटा जहाज छन् । हामी अरु ६ वटा जहाज थप्न खोजिरहेका छौँ ।’ उनले भने, ‘त्यसपछि हामी युरोप लगायतका ठाउँहरुमा जानसक्छौँ । त्यो हुने बित्तिकै हामी दुईवटा जहाजबाट मात्रै थप ३ लाख पर्यटक ल्याउन सक्छौँ । ६ वटा जहाजले ९-१० लाख पर्यटक त त्यत्तिकै थपिदिन्छ ।’
यस्तै मन्त्री अधिकारीले नेपालमा विप्रेषणको विकल्प पर्यटन भएको बताए । मुलुकमा रोजगारी सिर्जना गर्न नसक्दा लाखौँ युवाहरु रोजगारीको खोजीमा विदेशीन बाध्य भएको बताए । उनले विदेशबाट विप्रेषण प्राप्त भएपनि त्यो देशको समृद्धिको दिगो आधार नभएको बताए ।
पर्यटनको विकासबाट स्वदेशमा नै रोजगार सिर्जना गरी विप्रेषणको विकल्पका रुपमा पर्यटनको विकास अपरिहार्य रहेको बताउँदै पर्यटन मन्त्री अधिकारीले त्यसका लागि आवश्यक पूर्वाधार तयार गर्दै थप गन्तव्यको खोजीमा मुलुकका तीनै तहका सरकार जिम्मेवार भएर लाग्नु पर्ने बताए ।
त्रिभुवन अन्तर्राष्ट्रिय विमानस्थललाई हालको यात्रु क्षमतामा दोब्वर बनाउनुको साथै आगामी नौ महीनाभित्र भैरहवास्थित गौतम वुद्ध विमानस्थल र २०२० सम्ममा पोखरा अन्तर्राष्ट्रिय क्षेत्रीय विमानस्थल सञ्चालनमा आउने जानकारी दिए । पर्यटनलाई काठमाडौँ, पोखरा र चितवन मात्र सीमित नराखी मुलुकको पूर्वदेखि पश्चिमसम्म विस्तार गर्ने नीति सरकारको रहेको उल्लेख गर्दै मन्त्री अधिकारीले पर्यटन उद्योगमा लगानी बढाउन व्यवसायीलाई आग्रह गरे ।
मुलुकमा पर्यटनका लागि आवश्यक पूर्वाधार तयारी गरी पाँच वर्षमा ४० लाख बाह्रय पर्यटक भित्र्याउने योजनासाथ काम भईरहेको बताउँदै उनले त्यसबाट २५ प्रतिशत रोजगार सिर्जना हुने जानकारी दिए ।
मुलुकको आर्थिक विकासको मुख्य आधार पर्यटन भएको बताउँदै उनले पाँच वर्षभित्र मुलुकको कूल ग्रायस्थमा पर्यटन विकासको १० प्रतिशत योगदान रहने गरी काम भई रहेको उल्लेख गरे । कार्यक्रममा नेपाल भ्रमण वर्ष २०२० का संयोजक सुरज वैद्यले मुलुकमा पर्यटन विकास गर्न आवश्यक भौतिक पूर्वाधार र नयाँ गन्तव्यको उजागर भई रहेको कारण यसै वर्ष तोकिएको सङ्ख्यामा पर्यटक आउने बताए ।
पर्यटन विज्ञ आङछिरिङ शेर्पाले नेपालको पर्यटन क्षेत्रको विकास गर्न हिमाल र पदयात्रा गतिविधिलाई बढाउनुपर्नेमा जोड दिए । चारदिने सो महोत्सवमा चर्चित पाकिस्तानी लेखक मोहम्मद हनिफ, नेपाली मूलका भारतीय लेखक प्रज्जवल पराजुली, बेलायती ग्राफिक नोभलिस्ट डा निकोला स्ट्रिटेन र भारतीय पत्रकार हरिश नाम्वियरलगायत आठ देशका १२० लेखक तथा साहित्यकारको सहभागिता छ ।
