नेता श्रेष्ठले पनि गरे आफ्नै पार्टी नेतृत्वको आलोचना– ‘काममा भन्दा अमूर्त नारामा सीमित’

काठमाडौँ– सत्तारुढ दल नेकपाका वरिष्ठ नेता माधव नेपालले संसदमै उभिएर आफ्नै पार्टी नेतृत्वको सरकारको चर्को आलोचना गरेपछि नेकपाभित्र एकखालको तरंग नै आएको छ । यसैबीच पूर्व माओवादीबा आएका नेकपा नेता नारायणकाजी श्रेष्ठले पनि आफ्नै पार्टी नेतृत्वको सरकारको आलोचना गरेका छन् ।

सोमबार राजधानीमा आयोजित एक कार्यक्रममा नेता श्रेष्ठले सरकारका कामकारबाही सन्तोषजनक नरहेको बताए । उनले सरकार काममा भन्दा अमूर्त नारामा सीमित भएको आरोप लगाएका हुन् ।

पार्टीभित्र भ्रष्टाचार विरोधी सांस्कृतिक रुपान्तरणको आन्दोलन जरुरी रहेको बताउँदै नेता श्रेष्ठले भने, ‘मेरो गिरोहको वा मेरो गुटको वा मलाई आर्थिक सहयोग गर्ने भ्रष्टाचारीबाहेक अरु सबलाई म सफाया गर्दिन्छु भन्ने मानसिकताले भ्रष्टाचार विरोधी आन्दोलन हुन सक्दैन ।’

कम्युनिष्ट आन्दोलन सफल बनाउने हो भने मार्क्सको सच्चा सिद्धान्त व्यवहारमा अवलम्बन गर्नुपर्ने उनको भनाइ थियो । क्रान्ति वा रुपान्तरणको पहिलो निशाना सबै नेताले सुरुमा आफैलार्इ बनाउनुपर्ने धारणा राख्दै उनले पार्टी मार्क्सवादी सिद्धान्त र चिन्तनबाट विचल्लित हुँदै जानु चिन्ताको विषय रहेको बताए ।

पार्टीभित्र समयमै वैचारिक बहस नचलाउने हो भने कम्युनिष्ट पार्टी नाम मात्रको बन्ने र कम्युनिष्ट सरकार पनि केवल नारामा सीमित हुने खतरा रहेको उनको भनाइ थियो । दुई तिहाईको सरकारले गर्ने कार्यशैली जनताको पक्षमा हुनुपर्नेमा उनले जोड दिए ।