विरासत धान्दै काँग्रेस ब्युताउन जुटे कोईराला, सिंह र आलम !

काठमाडौँ– महामन्त्री सशांक कोईराला वीपी कोईरालाका छोरा हुन्, काँग्रेस नेता प्रकाशमान सिंह गणेशमान सिंहका छोरा हुन्, यस्तै अफ्ताव आलम शेख ल्याकतमा नाति तथा शेख ईद्रिसका सन्तान हुन् । यिनै तीन नेताका सन्तानले नेपाली कांग्रेसको नयाँ यात्राको थालनीका लागि शनिबार भेला गरेका छन् ।

पार्टीलाई बचाउनका लागि भएको भेटवार्ता एेतिहासिक भएको तीनै नेताले बताएका छन् । ‘काँग्रेस बँचाउन, पार्टीलाई पुरानै शक्तिशाली बनाउन हाम्रो भेट भयो’ बैठकपछि नेता आलमले हिमालय पोष्टलाई भने ‘अब काँग्रेसलाई देश हाँक्ने हैसियतमा दौडाउँछौँ, यो हामी तीनैजनाको सँकल्प हो ।’

काँग्रेसका बारेमा चिन्ता ब्यक्त गर्दै आलमले कोईराला र सिँहलाई नयाबानेश्वर स्थित आफ्नो घरमा ‘डिनर वार्ता’का लागि निम्ता गरेका थिए ।

करिब ३ घण्टा चलेको वार्तामा काँग्रेसको शक्ति फर्काउनका लागि तल्लो तह देखि केन्द्रीय तह सम्मै पुन्रजागरणको नयाँ रक्तसञ्चार गराउने निष्कर्ष तय भएको समेत नेताहरूले बताएका छन् ।

उपसभापति विमलेन्द्र निधिले मधेशमा आफूमात्र एकछत्र नेता भन्दै आएपछि २ नम्बर प्रदेशका आलमले उनलाई चुनौती दिनेगरी अगाडि बढ्न लागेका छन् । मधेशमा आफ्नो उपस्थितिलाई दह्रो बनाउने रणनीतिमा आलम देखिएका छन् ।