सुनुवाई समितिमा प्रस्तावित तीन न्यायाधीशविरुद्धका उजुरीकर्तासँग छलफल

काठमाडौँ – संसदीय सुनुवाई समितिले सर्वोच्च अदालतका प्रस्तावित तीन न्यायाधीशविरुद्ध उजुरी दिने उजुरीकर्ताहरूसँग छलफल गरेको छ ।

सिंहदरबारमा शुक्रबार बसेको समिति बैठकले उजुरीकर्तासंग छलफल गरेको हो । यही जेठ २७ गते बसेको न्याय परिषद् बैठकले वरिष्ठ अधिवक्ता मेघराज पोखरेल,उच्च अदालत जनकपुरका मुख्य न्यायाधीश श्रीकान्त पौडेल र उच्च अदालत दिपायलका मुख्य न्यायाधीश शान्तिसिंह थापालाई सर्वोच्चको न्यायधीश पदमा नियुक्तिका लागि सिफारिस गरेको थियो । उनीहरुविरुद्ध समितिमा पाँच वटा उजुरी परेको थियो ।

शुक्रबार उजुरीकर्तासंगको छलफलपछि अव आइतबार प्रस्तावित तीन न्यायाधीशको संसदीय सुनुवाई हुने सभापति ईश्वरी देवी न्यौपानेले जानकारी दिइन् । त्यस्तै न्यायपरिषद् सदस्यमा सिफारिस महेश कुमार नेपालको संसदीय सुनुवाई पनि आइतबार नै हुने उनले बताइन् । नेपालविरुद्ध भने कुनै पनि उजुरी परेको छैन ।