शिक्षक महासंघ र सरकारबीच भएको सहमतिप्रति विद्यालय परिषद्को आपत्ति

काठमाडौँ– नेपाल विद्यालय कर्मचारी परिषद्ले शिक्षक महासंघ र सरकारबीच भएको सहमतिप्रति आपत्ति जनाएको छ ।

विद्यालय कर्मचारीको माग मुद्दा सम्बोधन नगरि महासंघले एकपक्षीय ढंगले सरकारसंग सहमति गरि आन्दोलनका कार्यक्रम फिर्ता गरिएको भन्दै परिषद्ले सहमतिको भत्र्सना समेत गरेको छ ।

परिषद्का अध्यक्ष गंगाराम तिवारीले आफुहरुको माग मुद्दाप्रति महासंघ गम्भीर नबनेकाले आफुहरुको आपत्ति रहेको बताए । उनले महासंघको आन्दोलनमा निरन्तर साथ र समर्थन गरिरहको अवस्थामा विद्यालय कर्मचारी कै माग सम्बोधन नहुनु उचित नभएको जिकिर गरे । तिवारीले शिक्षकहरुले आन्दोलनका नाममा शिक्षक महासंघले राजनीति गरेको आरोप समेत लगाए ।

उनले परिषद्को बैठक बसेर आगामी रणनीति तय गर्ने जानकारी दिए । यसअघि बिहीबार नै काठमाडौंमा शिक्षक महासंघको समिक्षा बैठक बसेको थियो । सो क्रममा विद्यालय कर्मचारीहरुले आफुहरुको समस्या समाधान नभएको भन्दै आपत्ति जनाएपछि होहल्ला समेत भएको थियो ।