संसदका लागि बजेटको अभाव हुन नदिन सभामुखको आग्रह

काठमाडौँ – सभामुख देवराज घिमिरेले संघीय संसदको कामकारवाहीका लागि बजेटको कमि हुन नदिन आग्रह गरेका छन् ।

बुधबार सिंहदरबारमा संसदका लागि आवश्यक पर्ने बजेटका विषयमा विषयगत समितिका सभापतिसहित अर्थमन्त्री वर्षमान पुनसंग छलफल गर्दै सभामुख घिमिरेले आगामी आर्थिक बर्षमा सचिवालयले प्रस्ताव गरेको बजेट नघटाउन आग्रह गरेका हुन् ।

बजेट अभावका कारण समितिहरुको काम कारवाहीमा असर परेको भन्दै उनले आगामी आर्थिक वर्षमा यसलाई विचार गर्न समेत आग्रह गरेका थिए । छलफलका क्रममा अर्थमन्त्री पुनले आगामी बजेटमा संसदको बजेटलाई कटौती हुन नदिने गरि अघि बढ्ने आश्वासन दिएको उद्योग तथा वाणिज्य र श्रम तथा उपभोक्ता हित समितिका सभापति अब्दुल खानले जानकारी दिए ।

छलफलमा बजेटका अभावका कारण भइरहेको समस्याका बारेमा जानकारी गराउदै समिति सभापतिहरुले संसदको कामकारवाहीलाई चुस्त दुरुस्त बनाउन बजेटको कमी हुन नदिन आग्रह गरेका थिए ।