काठमाडौँ — एमाले स्थायी कमिटी सदस्य एवं पूर्वमन्त्री किरण गुरुङले जनमत गुमाइसकेपछि पनि प्रधानमन्त्री शेरबहादुर देउवाले आर्थिक अपराध गरिरहेको आरोप लगाएका छन् ।
तीनै तहका चुनावमा पराजित भएका देउवाले न्यूतम राजनीतिक संस्कार नदेखाएको भन्दै गुरुङले देउवाका निर्णय एकैपटक खारेज गर्ने चेतावनी दिए । ‘देउवाले आर्थिक अराजकतामात्रै होइन गम्भीर आर्थिक अपराध गरेका छन्,’ उनले भने, ‘सरकारका निर्णयलाई नयाँ सरकारले उल्टाउँछ ।’
देउवाले जनताप्रतिको उत्तरदायित्व बोध भएरभन्दा पनि अब सत्तामा आउन सकिंदैन भनेर मनपरी निर्णय गरेको गुरुङको भनाइ छ । ‘हामीले दिनुपर्दैन, तिर्नुपर्दैन, एमालेको सरकार बन्छ हेरौं के गर्छ भनेर आपराधिक सोचले ग्रस्त भएर निर्णय गरेको देखिन्छ, ‘यति विकृत मानसिकता बोकिएको छ कि, टिप्पणी गर्नसमेच लायक छैन ।’
मौजुदा कानुनमा टेकेर जे निर्णय भए पनि नयाँ सरकारले देश र जनताविरुद्धको निर्णयहरु खारेज गरेरै छाड्ने बताए । प्रदेश नम्बर ४ का मुख्यमन्त्री दाबेदार गुरुङले देउवाले गरेका राजनीतिक नियुक्तिहरु एउटा पनि बाँकी नछाड्ने भन्दै सबैलाई हटाइदिने चेतावनी दिए ।
बृद्धभत्ताको उमेर घटाउँदै सरकारकै आर्थिक सल्लाहकारकोरुपमा रहेको राष्ट्रिय योजना आयोगकोसमेत परामर्श नलिएकोमा आपत्ति जनाए । ‘एकातिर नेपालीको आयु वृद्धि भइरहेको छ, अर्कोतिर अर्थतन्त्रमा गम्भीर समस्याहरु देखिएका छन्, गुरुङको भनाइ छ, ‘आर्थिक वितरणजस्तो विषयमा वैज्ञानिक प्रणालीसम्म नअपनाएर के गर्न खोजिएको बुझिनसक्नु छ ।’
-कान्तिपुर