ललितपुरको नागबहालमा जर्मन महिला मृत फेला

काठमाडौँ – ललितपुर महानगर नागबहालमा एक जना जर्मन नागरिक मृत अवस्थामा फेला परेकी छन् ।

ग्रिन तारा हेरिटेज होम एण्ड अपार्टमेन्टमा बस्दै आएकी अन्दाजी ५७ वर्षीया एडल हिप डोरा नाम गरेकी जर्मन महिला मृत अवस्थामा फेला परेको प्रहरीले जनाएको छ । घटनाको जानकारी पाउने बितिकै प्रहरीको टोली घटनास्थलमा पुगेको थियो ।

कोठाको ढोका खोलेर हेर्दा लडेको अवस्थामा फेला परेको र टाउकोमा घाउ भएर धेरै रगत बगेको देखिएको ललितपुर प्रहरी प्रमुख एसएसपी शेखर खनालले जानकारी दिए । घटनापछि तालिमप्राप्त कुकुर र पाटन अस्पतालको फोरेन्सीक टोलीले जाँच गर्दा तत्काल शंकास्पद अवस्था नदेखिएकोे खनालले बताए ।

शवको पोष्टमार्टमका लागि शिक्षण अस्पताल लगिएको प्रहरीले जनाएको छ । उक्त महिला विगत दुई वर्षदेखि अपार्टमेन्टमा बस्दै आएकी थिइन् । त्यस्तै उनले काभ्रेमा रिसोर्ट समेत सञ्चालन गरेको खुल्न आएको प्रहरीले जनाएको छ ।