कलाकार पल शाहलाई अनुसन्धानका लागि हाजिर गराइदिन नवलपुर प्रहरीले पठायो चिठ्ठी

काठमाडौँ– कलाकार पूर्ण विक्रम शाह(पल शाह) लाई अनुसन्धानका लागि हाजिर गराउनका निम्ति नवलपरासी (बर्दघाट–सुस्तापूर्व)को इलाका प्रहरी कार्यालयले जिल्ला प्रहरी कार्यालय, तनहुँलाई पत्राचार गरेको छ ।

गैँडाकोटमा पनि सुटिङका क्रममा कलाकार पल शाहबाट बलात्कृत भएको भन्दै पिडित पक्षले कलाकार शाहविरुद्ध गत १५ फागुनमा अर्काे उजुरी दर्ता गराएको थियो । र, त्यसैको अनुसन्धानका लागि नवलपरासी प्रहरीले शाहलाई उपलब्ध गराइदिन भन्दै लिखित पत्र पठाएको हो ।

सामान्य भिडियो इडिटिङबाट मोडे हुँदै नेपाली सिने जगत्मा पाइला चालेका पल शाह यतिबेला नाबालिगमा यौन सम्बन्ध स्थापित गरेको कसुरमा न्यायिक हिरासतमा छन् । उनीमाथि नाबालिगलाई प्रलोभन देखाएर पटक–पटक यौन सम्बन्ध स्थापित गरेको आरोप छ ।

यसअघि पिडित पक्षले गत फागुन ११ गते जिल्ला प्रहरी कार्यालय तनहुँमा पनि उजुरी दिएका थिए । गत बुधवार प्रहरी सामु आफै आत्मसर्मपण गरेका शाहलाई अदालतको हिजो (आइतबार) थप १२ दिन हिरासतमा राख्न अनुमति दिएको छ ।