काठमाडौँ – नेकपा एमालेका अध्यक्ष केपी शर्माओलीले वर्तमान सरकारले देशको राजनीतिक र आर्थिक अवस्था ‘ब्ल्याक होल’तर्फ धकेलेको दाबी गरेका छन् ।
ADVERTISEMENT
शुक्रबार नेकपा एमाले स्थानीय तह निर्वाचन तयारी केन्द्रीत प्रशिक्षण तथा अभिमुखीकरण कार्यक्रमको उद्घाटन गर्दै ओलीले वर्तमान सरकार गठन भएको ६–७ महिनामै आफ्नो सरकारले ल्याएको स्वणीय युग हराएको जिकिर गरे ।
ADVERTISEMENT
नेपाललाई विश्व बैँकले नेपाललाई दक्षिण एशियाको उदाउँदो अर्थतन्त्र भनेको, हामीलाई एशियाली विकास बैँक (एडीबी) युनेस्को, विश्व स्वास्थ्य संगठनले प्रशंसा गरेको समेत दाबी गर्दै उनले आज ती दिन हराएको उल्लेख गरे ।
उनले भने, ‘६ महिना, ७ महिना बित्न पाउँदा नपाउँदै कहाँ गए ती दिन ? कता गयो त्यो स्वणीम युग ? कता हराए ती आशाका किरणहरु ? कता हरायो त्यो विश्वासको वातावरण ? आज भयावह, निराशा छ । एक ढंगले भन्ने हो भने यो सरकारले आर्थिक राजनीतिक हिसाबले ‘ब्ल्याकहोल’ तर्फ धकेलिरहेको छ ।’
उनले मुलुकको बाह्य सम्बन्धमा गम्भीर असर र विचलनहरु देखा परेको उनले जिकिर गरे । गठबन्धन सरकार विदेशीहरुको लागि कम्फर्टेबल बन्ने वचनवद्धतासहित गठन भएको बताउँदै उनले नेपालको राष्ट्रिय हितमाथि निरन्तर आँच पुग्दा पनि चूप लागिरहेको र जानीबुझी पुर्याइरहेको दाबी गरे ।
उनले प्रश्न गरे, ‘कालापानी क्षेत्रमा एकतर्फी बाटो बन्दा बोल्दैन । जयसिंह धामी तुईन काटेर झराइन्छन्, बोल्ने हिम्मत राख्दैन नागरिकहरुको जीवनको सम्बन्धमा र नागरिकको ज्यान जान्छ, त्यस्तोको छानबिन गरेर दोषीमाथि कारबाही गर भनेर पनि भन्न सक्दैन । यो भन्दा पनि निरीहता, जनताप्रतिको गैरजिम्मेवारी के हुन सक्छ ?’
यस्तै अध्यक्ष ओलीले विभिन्न प्रदेशमा भइरहेको मन्त्रालय विभाजन गरी थप गरिएको प्रति आलोचना गरेका छन् । गठबन्धन टिकाउनका लागि संघ र प्रदेश सरकारले अनावश्यक रुपमा राज्यलाई भार पर्नेगरी संरचना निर्माण गरिएको बताए ।
उनले भने, ‘गठबन्धन टिकाउन संर प्रदेशमा जथाभावी संरचना निर्माण गरिएका छन् । प्रदेशमा कतै १८ वटा मन्त्रालय, कतै १४ वटा मन्त्रालय । उल्फाको धन फपूको श्राद्ध भन्ने नेपाली उखान जस्तो । के पायो, लूटमार चलेको छ । अर्थतन्त्र कुन अवस्थामा छ र क्रियाकलाप कतातर्फ जाँदैछ । यो भयावह छ ।’
सरकार गठन भएको ६ महिनामै व्यापार घाटा ५५ प्रतिशतले बढेर ८ खर्बभन्दा बढी पुगेको बताउँदै उनले विदेशी मुद्राको सिन्चिती निरन्तर घट्दै गएर साढे ६ महिनाको आयात धान्न नसकिने स्थिति विगत एक दशककै न्यूनतम बिन्दु रहेको बताए ।
