काठमाडौं – प्रधानमन्त्री शेरबहादुर देउवाले पार्टीको महाधिवेशनमा शक्ति प्रदर्शन नगर्ने बताएका छन् । कोरोनाको जोखिम कायम रहेको भन्दै प्रधानमन्त्री देउवाले पार्टीको महाधिवेशनमा शक्ति प्रदर्शन नगर्ने बताएका हुन् ।
उनले नेकपा एमालेको चितवनमा भएको महाधिवेशनको प्रशंग झिक्दै भने, ‘कांग्रेसले चाहने हो भने त्योभन्दा डबल जनलहर ल्याउन सक्छ । तर अहिले शक्ति प्रदर्शन गर्ने बेला छैन । कोरोनाको तेस्रो लहर आउँदै छ। त्यस मानेमा हामी संवेदनशील छौं ।’
सोमबार बिहान सञ्चारकर्मीसँग कुरा गर्दै १४ औं महाधिवेशनमा आफू सभापति बन्ने अन्तिम मौका भएकाले योपटक आफूलाई सहयोग गर्न आग्रह गरेका छन् । ‘पार्टीको विधानले पनि मलाई अर्को पटक सभापतिमा लड्न दिँदैन।यो अन्तिम पटक हो ‘, उनले भने।
देउवाले सत्ता गठबन्धन राष्ट्रियसभाको चुनावसम्म मात्र भएको दावी गरे । ‘मुलुकको व्यवस्थाको रक्षाका लागि गठबन्धनबाट नेतृत्व गरेको छु । यो गठबन्धन राष्ट्रियसभाको चुनाव सम्मलाई मात्र हो ।’ उनले भने, ‘मैले पटकपटक भन्दै आएको छु । पार्टीका साथीहरूसँग पनि आग्रह गरिसकेको छु । यो पटक मलाई सहयोग गरिदिनुस् ।’