काठमाडौँ – प्रधानमन्त्री केपी शर्मा ओलीले दक्षिण एसियाली फुटबल प्रतियोगिता (साफ) आयोजना गर्न नेपाल तयार रहेको बताएका छन् ।
ADVERTISEMENT
आइतबार प्रधानमन्त्री निबास बालुवाटारमा थ्री नेसन्स कपको उपाधि विजेता राष्ट्रिय फुटबल टिमका खेलाडीलाई पुरस्कृत गर्दै प्रधानमन्त्री ओलीले साफ खेलकुद नेपालले गर्न सक्ने भन्दै तयारीमा जुट्नुपर्ने बताएका हुन् ।
ADVERTISEMENT
खेलाडीहरुमा जितको उत्साह रहेको भन्दै उनले साफ पनि नेपालमा हुने र नेपालले जित्ने र त्यसका लागि अहिले देखि नै तयारी थाल्न खेलाडीलाई सुझाए । ‘के तपाईंहरु साफ जित्नलाई तयार हुनुहुन्छ ?’ खेलाडीतर्फ हेर्दै प्रधानमन्त्री ओलीले भने, ‘तपाईंहरु साफ जित्नलाई तयार हुनुहुन्छ भने हामी पनि साफ आयोजना गर्न तयार छौँ । तपाईंहरु जित्न तयार हुनुहोस् ।’
प्रधानमन्त्री ओलीले अखिल नेपाल फुटबल संघ (एन्फा) र राष्ट्रिय खेलकुद परिषद (राखेप) लाई साफ आयोजनाको तयारी अघि बढाउन समेत निर्देशन दिए । आयोजक राष्ट्र बंगलादेशले प्रतियोगिताबाट हात झिकेपछि नेपालमा साफ आयोजना गर्न एन्फाले दाबी पेश गरेको छ । प्रधानमन्त्री ओलीले नेपाललाई खेलकुदमा जित्ने बानी परेको र यसलाई निरन्तरता दिनुपर्ने बताए ।
‘नेपालको विस्तारै विस्तारै जित्ने बाढी पर्न थालेको छ । यो बानी बढाउनु पर्छ ।’ उनले भने, ‘रिसाएर, झर्किएर जितिँदैन । संयमित भए जितिन्छ । टिमको मनोबल भनेको हरेक खेलाडीको मनोबल हो । जब एकरुपता हुन्छ तब जितिन्छ ।’
खेल र खेलाडीको विकासका लागि राज्य सदैव तयार रहेको प्रधानमन्त्री ओलीको भनाई छ । खेलाडीको जित नै देशको जित भएको भन्दै प्रधानमन्त्री ओलीले अर्को पुरस्कार लिने तयारीमा लाग्न आग्रह गरे ।
कार्यक्रममा प्रधानमन्त्री ओलीले थ्री नेसन्स कप अन्तराष्ट्रिय फुटबलको उपाधि विजेता नेपाली राष्ट्रिय फुटबल टोलीलाई जनही ४ लाख नगदसहित पुरस्कृत गरे । सरकारले यस अघि नै घोषणा गरेको पुरस्कार आइतबार खेलाडीलाई प्रदान गरेको हो । पुरस्कार पाउनेहरुमा २३ जना खेलाडी, प्रशिक्षक बालगोपाल महर्जन, सहायक प्रशिक्षक किरण श्रेष्ठ र गोल किपिङ प्रशिक्षक विकास मल्ल रहेका छन् । पुरस्कार ग्रहणपछि राष्ट्रिय टोलीका कप्ताल किरण चेम्जोङले सरकारले आफुहरुको हौसला बढाएको बताए ।
गत चैतमा भएको प्रतियोगीतामा बंगलादेशलाई २–१ गोल अन्तरले पराजित गर्दै नेपालले उपाधि जितेको थियो । दशरथ रंगशालामा भएको उक्त फाइनल हेर्न प्रधानमन्त्री ओली रंगशाला पुगेका थिए ।
