काठमाडौँ – विश्वकै दोस्रो अग्लो हिमाल ‘केटू’ हिमालको जाडोयाममा सफल आरोहण गरी नयाँ रेकर्ड बनाएका १० नेपाली आरोहीलाई सरकारले विशेष सम्मान गरेको छ ।
मंगलबार पर्यटन मन्त्रालयले प्रधानमन्त्री निवास बालुवाटार आयोजना गरेको कार्यक्रममा गर्दै प्रधानमन्त्री केपी शर्माओलीले आरोहण गरेर मंगलबार मात्रै नेपाल आइपुगेको नेपाली टोलीलाईलाई सम्मान गरेका हुन् ।
सो अवसरमा प्रधानमन्त्री ओलीले ओरोही दललाई बधाई दिँदै आगामी दिनमा पर्वतारोहीहरुलाई सरकारले सक्दो सहयोग गर्ने प्रतिवद्धता जनाए । सम्मान कार्यक्रममा संस्कृति, पर्यटन तथा नागरिक उड्डयनमन्त्री भानुभक्त ढकाल, सरकारका प्रवक्ता एवम् सूचना तथा सञ्चार प्रविधिमन्त्री पार्वत गुरुङ लगायतको उपस्थिति रहेको थियो ।
पर्वतारोहणको क्षेत्रमा विश्वमै दुर्लभ कीर्तिमान कायम गरेका म्याग्दीको अन्नपूर्ण गाउँपालिका–३ दानाका निर्मल पुर्जा ‘निम्स’ सहित १० नेपाली आरोही समूहले माघ ३ शनिबार केटूको शिखरमा पुगेर आरोहणमा कीर्तिमान कायम गरेका थिए ।
उनीहरु पाकिस्तान र चीनको सिमानामा अवस्थित संसारकै दोस्रो अग्लो आठ हजार ६११ मिटर अग्लो केटू हिमालमा जाडोयाममा आरोहण गर्ने विश्वकै पहिलो आरोही बन्न सफल भएका छन् । आरोहणमा पुर्जालाई मिग्मा डेभिड शेर्पा, मिङमा तेन्जिङ शेर्पा, ग्याल्जेन शेर्पा, पेमा चिरी शेर्पा, दावा शेर्पा, किलु शेर्पा, मिङमा जी, दावा तेन्जिङ शेर्पा र सोना शेर्पाको आरोही टोलीले सघाएको थियो ।
केटूको चुचुरोमा नेपालको राष्ट्रिय गानका साथ नेपाली झण्डा फहराएको तस्वीर सामाजिक सञ्जालमा सार्वजनिक भएको थियो । जाडोयाममा अहिलेसम्म कसैले पनि केटूमा आरोहण गर्न सकेका थिएनन् ।
Brother to brother, shoulder to shoulder, we walked together to the summit whilst singing the Nepali national anthem. We all stopped around 10m before reaching the summit to huddle and make our final steps together as a team to mark this historical feat .. 1/4 #K2winter pic.twitter.com/P2kCwRy1Vn
— Nirmal Purja MBE (@nimsdai) January 24, 2021
जाडोयाममा माइनस ८० डिग्रीको तापक्रम र १०० माइल प्रतिघण्टाको वायु गतिजस्ता प्रतिकूल अवस्थामा समेत आरोहण रच्ने नेपाली आरोहीको सफलताले विश्वभर चर्चा पाएको छ । विश्वभरका पर्वतारोहीले केटु हिमाललाई किलर हिमालको रूपमा समेत चर्चा गर्ने गरेका छन् । केटू हिमालमा अहिलेसम्म जम्मा ३६७ सफल आरोहण भएका छन् भने आरोहणको प्रयासमा ८६ जनाले ज्यानसमेत गुमाइसकेको जनाइन्छ ।
तस्बिरहरु : प्रधानमन्त्रीको सचिवालय