जन्म दिनको अवसरमा ‘धुर्मुस सुन्तली’ले शिलान्यस गरे अर्को एकिकृत नमुना वस्ती

रौतहट– कलाकार तथा समाजसेवी धुर्मुसको जन्म दिनको अवसर पारेर ‘धुर्मुस सुन्तली फाउन्डेसन’ले रौतहटका बाढी पीडितका लागि एकिकृत नमुना वस्तीको शिलान्यास गरेको छ ।

आज रौतहटको सन्तपुरमा एक कार्यक्रमको आयोजना गर्दै सुताराम कट्टेल धुर्मुस र उनकी श्रीमति कुञ्जना घिमिरे सुन्तलीले संयुक्त रुपमा एकिकृत वस्तीको शिलान्यास गरेका हुन ।

५ करोड ७५ लाखमा निर्माण हुने उक्त वस्ती माझी, मुसहर, हजाम र देशार समुदायका लागि बनाउन लागिएको धुर्मुसले बताए । बाढीको चपेटामा परेका ती समुदायको जीवनस्तर उकास्नका लागि वस्ती निर्माण सुरु गरिएको उनको भनाइ छ ।

आउदो माघसम्म वस्ती निर्माण सक्ने योजना बनाएका धुर्मुस–सुन्तलीले २ नम्बर प्रदेशका होटल ब्यबसायी संघ लगायत अन्य स्थानीयको पनि सहयोग रहेको जानकारी दिए । भूकम्पपछि सामाजिक काममा सक्रिय भएका सिताराम र कुञ्जनाले अहिले धुर्मुससुन्तली फाउण्डेशन सञ्चालन गरेका छन् ।

फाउण्डेशनले यसअघि गिरान्चौर र मुसहरहरुका लागि सामूहिक वस्ती निर्माण गरेर हस्तान्तरण गरिसकेको छ ।