बेनी, म्याग्दी– सरकारी दरबन्दी नहुँदा विद्यालय सञ्चालन गर्न कठिन भएपछि म्याग्दीका दुईवटा विद्यालयले संयुक्तरुपमा लगानी गरी चौँरीपालेर त्यसबाट हुने आम्दानीे शिक्षकलाई तलब खुवाउने र भौतिक तथा शैक्षिक पूर्वधारमा खर्च गर्ने गरेका छन् ।
ADVERTISEMENT
म्याग्दीको अन्नपूर्ण गाउँपालिका–५ पाउद्वारको पाउद्वार मावि र वडा नं–८ को हिमाञ्चल मावि नागीले चौंरीपालन गरी त्यसको आम्दानीले विद्यालय सञ्चालन गर्दै आएको हो ।
ADVERTISEMENT
खयरबराह क्षेत्रमा चौंरीपालन गरी चौंरीको आलो रगत र मासु बिक्रीबाट वार्षिक हुने आम्दानीले निजी स्रोतका शिक्षकको तलब भत्ता, विद्यालयको भौतिक पूर्वाधार मर्मत, शैक्षिक साम्रगी खरिदका साथै विद्यार्थीको शैक्षिक क्षमता विकाससम्बन्धी विभिन्न गतिविधिमा खर्च गर्दै आइरहेको हिमाञ्चल मावि नागीका प्रअ रमन पुनले बताए ।
दुबै विद्यालयले विद्यालयको आन्तरिक आम्दानीलाई दिगो बनाउन करिब एक दशक अगाडिदेखि चौंरीपालन गर्दै आइरहेको पाउद्वार माविका विद्यालय व्यवस्थापन समितिका अध्यक्ष भीमप्रसाद तिलिजाले बताए ।
अहिले १६८ वटा चौंरी रहेका र ती चौंरीबाट वार्षिक रु १० लाख आम्दानी हुने गरेको तिलिजाको भनाइ छ ।
साउन र फागुन महिनामा चौंरीको आलो रगत पिउने र मासु बिक्रीबाट हुने आम्दानीलाई खर्च कटाएर दुईवटा विद्यालयले आम्दानी बाँडफाँड गर्ने गरिएको छ ।
दुईजना कर्मचारीलाई प्रतिव्यक्ति रु १२ हजार तलब, लत्ता कपडा, जंगली जनावरको आक्रमणबाट जोगिने औजारका साथै खाद्य साम्रगीलगायतका सुविधा उपलब्ध गराउने गरेको संयुक्त चौंरीपालक कृषक समूहले जनाएको छ ।
मनाङ, मुस्ताङ र म्याग्दीको हिमाली क्षेत्रमा चौंरीपालन सम्भव देखिएपछि दुबै विद्यालयले आफ्नो लगानीमा चौंरी भित्र्याएका थिए । “दुबै विद्यालयका प्रतिनिधि आवश्यकताअनुसार चरन क्षेत्रमै पुगेर चौंरीको हेरचाह गर्ने गरेका छौंँ” हिमाञ्चल माविका प्रधानाध्यापक रमन पुनले भने ।
उनका अनुसार चौंरीबाट भएको आम्दानीले निजी स्रोतका दुई/दुईजना शिक्षकलाई तलब भत्ता दिनुका साथै शैक्षिक गतिविधिमा राहत मिलेको छ ।
