काठमाडौँ – प्रधानमन्त्री केपी शर्मा ओलीको सिंगापुरको नेसलन युनिर्भसिटी हस्पिटलमा उपचार सुरु भएको छ । प्रधानमन्त्री ओलीको शुक्रबारदेखि प्लाज्मा फेरेसिस प्रकृया सुरु गरिएको उनका निजी चिकित्सक प्रा. डा.दिब्या सिंहलाई उद्धृत गर्दै प्रमुख सल्लाहकार विष्णु रिमालले जनाएका छन्।
मिर्गौलाको क्षमता अभिवृद्धिका लागि उक्त उपचार थालिएको हो । डा. शाहका अनुसार प्लाज्मा फेरेसिस प्रक्रियामार्फत प्रधानमन्त्री ओलीको उपचार थालिएको हो । अरू केहीपटक प्लाज्मा फेरेसिस गर्नुपर्ने बताए पनि उनले कतिपटक यस्तो गर्नुपर्छ भन्नेबारे केही खुलाइनन् ।
प्रधानमन्त्रीको अवस्था सामान्य रहेको प्रमुख सल्लाहकार रिमालले बताएका छन् । प्रधानमन्त्री ओली मिर्गौलाको विरामी हुन् । उनले १२ वर्षअघि मिर्गौला प्रत्यारोपण गराएका थिए ।
प्रधानमन्त्री पत्नी राधिका शाक्य, प्रमुख सल्लाहकार रिमाल, निजी चिकित्सक सिंह, स्वकीय सचिव राजेश बज्राचार्यसहितलाई लिएर उपचारका लागि सिंगापुरमा छन्।