असन्तुष्ट दललाई निर्वाचनमा सहभागी गराइन्छ : उपप्रम महरा

चितवन– उपप्रधानमन्त्री तथा परराष्ट्रमन्त्री कृष्णबहादुर महराले संविधान संशोधन गरेर असन्तुष्ट दललाई निर्वाचनमा सहभागी गराइने बताएका छन्।

उनले संशोधनको तयारी भइरहेको समेत जानकारी दिए । नेकपा (माओवादी केन्द्र)का नेतासमेत रहेका मन्त्री महराले यहाँ आज पार्टी कार्यकर्तालाई सम्बोधन गर्दै सङ्गठन कमजोर भएकाले पार्टीले स्थानीय निर्वाचनमा सोचे जस्तो परिणाम ल्याउन नसकेको बताए।

उनले आफ्नो पार्टी बलियो रहेको जिकिर गर्दै जनताको हितमा काम गर्न कार्यकर्तालाई निर्देशन दिए । आगामी कात्तिक/मंसिरमा अर्को तहको निर्वाचन हुने भएकाले तयारीमा रहन र संगठनलाई थप मजबुत बनाउन कार्यकर्तालाई आग्रह गरे ।

मन्त्री महरा आज चितवनका विभिन्न चारवटा कार्यक्रममा सहभागी भएका थिए । रासस